کراچی:کراچی میں رینجرز نے گرفتار ٹارگٹ کلر کی نشاندہی پر کارروائی کرتے ہوئے عزیز آباد کے علاقے میں ایک گھر سے بڑی تعداد میں اسلحہ اور رینجرز کی وردیاں برآمد کر لیں،کرنل فیصل کا کہنا ہے کہ انتہائی مطلوب ملزم کاشف ڈیوڈ کو گذشتہ رات گرفتار کیا گیا جو ٹارگٹ کلنگ کی متعدد وارداتوں میں ملوث ہے۔

کراچی میں صبح سویرے رینجرز نے نائن زیرو کے قریب ایک اور کامیاب کاروائی کی،رینجرز کے مطابق ٹارگٹ کلنگ کی متعدد وارداتوں میں ملوث کاشف عرف ڈیوڈ کو گذشتہ رات گرفتار کیا گیا تھا جسکی نشاندہی پر عزیز آباد کے علاقے مور پارک کے قریب ایک گھر میں چھاپہ مارا گیا جہاں اسلحہ کی بڑی تعداد چھپائی گئی تھی۔

رینجرز کے کرنل فیصل کا میڈیا سے گفتگو میں کہنا تھا کہ چھاپے کے دوران اسلحہ اور گولیوں کی بڑی تعداد کے ساتھ رینجرز کی وردیاں بھی برآمد ہوئی ہے۔

انہوں نے مزید کہا کہ کاشف عرف ڈیوڈ کا تعلق ایم کیو ایم سے ہے جو عسکری ونگ کا اہم رکن اور انتہائی مطلوب ملزم تھا،کا شف ڈیوڈ کراچی میں قتل کی متعدد وارداتوں میں ملوث ہے جس سے مزید تفتیش کی جا رہی ہے۔