اسلام آباد:اپوزیشن نے تیسرے روزبھی وزیراعظم کی قومی اسمبلی میں عدم موجودگی پرواک آؤٹ کردیا۔

قومی اسمبلی کا اجلاس اسپیکرایازصادق کی صدارت میں شروع ہوا تو جماعت اسلامی کے پارلیمانی لیڈرطارق اللہ نے کہاکہ بنگلہ دیش میں جماعت اسلامی کے امیرمطیع الرحمن کو پھانسی دیئے جانے کی مذمت کرتے ہیں ۔

 ایوان میں ان کےلیے فاتحہ خوانی بھی کی گئی ۔ یہ عدالتی قتل اورانسانی حقوق کی خلاف ورزی ہے ۔

 حکومت اس کی مذمت کرے کیونکہ ان لوگوں کو پاکستان سے محبت کی سزا دی گئی۔

 شاہ محمود قریشی نے کہاکہ بنگلا دیش میں بہت بڑا ظلم ہوا، 1947 کے معاہدے کی خلاف ورزی ہے، اس معاملے پرایوان کی متفقہ قرارداد آنی چاہئے ۔

 پیپلزپارٹی کے رکن اعجازجاکھرانی نے کہا کہ علی حیدر گیلانی کی بازیابی پر ان کے والد یوسف رضا گیلانی کومبارک دیتے ہیں ، انہوں نے بڑے مسائل جھیلے ۔

 جبکہ اپوزیشن نے وزیراعظم کی عدم موجودگی کے خلاف قومی اسمبلی سے آج بھی واک آؤٹ کیا ۔

تحریک انصاف کے حامد الحق کی کورم کی نشاندہی پراسپیکرنے گنتی کرائی ۔

 کورم پورانہ ہونے پراسپیکرنے اجلاس کی کارروائی کچھ دیرکیلئے معطل کردی ۔

 قومی اسمبلی میں ایک بارپھرحکومت کی سبکی کا سامنا ہے ۔

 اپوزیشن کے واک آؤٹ کے بعد حکومت اپنے ارکان کی ایوان میں حاضری یقینی بنانے میں ناکام ہے ۔