تحریک انصاف کے چیئرمین عمران خان کہتے ہیں کہ کیپٹن صفدر کی جانب سے اپنی اہلیہ کے اثاثوں کو چھپانے کے خلاف پی ٹی آئی نے کیس الیکشن کمیشن میں فائل کردیا ہے۔

عمران خان نے اپنے ٹوئٹ پیغام میں کہا کہ پاناما پیپرز جیسے معاملات پر ایکشن لینا نیب کی قانونی ذمہ داری ہے، انکا کہنا تھا کہ اگر احتساب کا ادارہ پاناما لیکس کے انکشافات پر وزیراعظم کے خلاف حرکت میں نہیں آتا تو نیب کے سربراہ جرم کا ارتکاب کریں گے۔

عمران خان نے کہا کہ کیپٹن صفدر نے اہلیہ کے اثاثے چھپائے، تحریک انصاف نے الیکشن کمیشن میں یہ کیس فائل کردیا ہے،قوم انتظار کررہی ہے کہ کب الیکشن کمیشن اپنے قوانین پر عمل درآمد کراتا ہے۔چیئرمین پی ٹی آئی کا مزید کہنا تھا کہ طاقتور کیلئے الگ قانون اور کمزور کیلئے الگ ہے، رسول اللہ کا فرمان ہے کہ قانون کے دوہرے معیار پر کئی قومیں نیست و نابود ہو گئیں۔