اسلام آباد: وزیراعظم نواز شریف نے کہا ہے کہ  وطن کو بیرونی خطرات سے بچانے کے لئے تیاری قومی ذمہ داری ہے تاکہ کوئی پاکستان کی طرف میلی آنکھ سے دیکھنے کی جرات نہ کر سکے۔

ہفتہ کو یوم تکبیر پر پیغام میں وزیراعظم نے قوم کو مبارک باد پیش کی اور کہا ' ہمارا ایٹمی پروگرام ناقابل تسخیر ہے، پاکستان امن پر یقین رکھتا ہے اور آپریشن ضرب عضب بھی دراصل اسی عزم کا تسلسل ہے'۔

'ملک میں امن بحال ہورہا ہے اور پاکستان کو اب اپنی اقتصادی حالت بہتر بنانا ہوگی۔'

 نوازشریف نے امید ظاہر کی کہ اقتصادی میدان میں بھی قوم اپنی صلاحیت کا مظاہرہ کرے گی۔

دوسری جانب، وزیراعلیٰ پنجاب شہبازشریف نے کہا ہے کہ 28مئی پاکستان کی سیاسی اور دفاعی تاریخ کا اہم ترین دن ہے۔

'ایٹمی طاقت بننے کے بعد آج کوئی بھی ارض پاک کی جانب میلی آنکھ سے نہیں دیکھ سکتا۔'

وزیراعلیٰ شہبازشریف نے اٹھارویں یوم تکبیر کے موقع پر قوم کو پیغام دیتے ہوئے کہا ہے کہ 28مئی 1998کو اسلامی دنیا کے اس عظیم ملک نے تمام تر دباؤکے باوجود ایٹمی دھماکے کرکے ایک نئی تاریخ رقم کی اور پوری قوم کا سرفخر سے بلند ہوا۔