اسلام آباد:وزیر اعظم کی اوپن ہارٹ سرجری منگل کو لندن میں ہوگی۔  ترجمان وزیراعظم ہاؤس کا کہنا ہے وزیراعظم کل ویڈیو لنک کے ذریعے وفاقی کابینہ اور قومی اقتصادی کونسل کے اجلاس کی صدارت کریں گے جس میں بجٹ اہداف کی منظوری دی جائے گی۔

وزیراعظم محمد نواز شریف لندن میں زیر علاج ہیں جہاں منگل کو ان کی اوپن ہارٹ سرجری ہوگی ۔ترجمان کے مطابق وزیراعظم کا آپریشن منگل کے روز ہو گا جبکہ ان کی وطن واپسی کا فیصلہ ڈاکٹرز کریں گے ۔وزیراعلیٰ پنجاب شہباز شریف  حمزہ شہباز  کے ہمراہ لندن روانہ ہوگئے ہیں ۔

گزشتہ روز آرمی چیف نے وفاقی وزیرداخلہ اور وزیراعلیٰ پنجاب سے ملاقات کرکے وزیراعظم کی خیریت دریافت کی اس اہم ملاقات میں ملک کی مجموعی صورتحال پر بھی تبادلہ خیال کیا گیا۔

وزیراعظم ہاؤس کے ترجمان نے یہ واضح کیا کہ بیماری سے منسلک تمام اخراجات وزیراعظم کا خاندان برداشت کر رہا ہے۔

وزیراعظم ویڈیو لنک کے ذریعے وفاقی کابینہ اور قومی اقتصادی کونسل کے اجلاس کی صدارت کریں گے جس میں بجٹ کے اہداف کی منظوری سمیت اہم امور پر غور کیا جائے گا۔

دوسری جانب سیاسی مخالفت سے قطع نظر سیاسی قیادت وزیراعظم کی صحتیابی کیلئے  دعا گو ہے۔

عمران خان نے وزیراعظم کی صحت کیلئے نیک تمناؤں کا اظہارکیا ،کہا کہ انکی دعائیں وزیراعظم کے ساتھ ہیں،وہ جلد صحتیاب ہوں گے۔

بلاول بھٹو زرداری نے عوام سے اپیل کی ہے کہ وہ وزیراعظم کی صحتیابی کیلئے دعا کریں۔

ادھر بھارتی وزیر اعظم نریندر مودی نے بھی وزیراعظم کی جلد صحتیابی کیلئے دعا کی ہے۔