اسلام آباد:وفاقی کابینہ نے نئے مالی سال دو ہزار سولہ سترہ کے وفاقی بجٹ کی منظوری دیدی ہے۔ بجٹ کا کل حجم تقریبا ً44 کھرب روپے ہے، کابینہ سے منظور بجٹ کا فنانس بل تین جون کو قومی اسمبلی میں پیش کیا جائے گا۔

وفاقی کابینہ کے خصوصی اجلاس میں نئے بجٹ کیلئے ٹیکس وصولیوں کا ہدف 36 کھرب روپے سے زائد رکھنے کی تجویز منظور کی گئی ہے۔

وفاقی بجٹ سے قرضوں کی ادائیگی پر 15.5 کھرب،جبکہ دفاعی بجٹ8.5 کھرب روپے سے زائد کا رکھا گیا ہے۔ سرکاری ملازمین کی تنخواہوں اور  پنشن کی مد میں 6 کھرب 15 ارب روپیہ مختص کیے گئے ہیں۔

بجٹ میں ملک کی مجموعی قومی معیشت کا موجودہ تیس اعشاریہ سڑسٹھ کھرب حجم بڑھا کر چونتیس اعشاریہ آٹھ کھرب کیا جائے گا، درآمدی موبائل فونز پر ایکسائز ڈیوٹی کی شرح دگنی کرنے کی تجویز ہے۔بینکنگ، انشورنس، اسٹاک مارکیٹ، فاریکس ڈیلرز پر ایکسائز ڈیوٹی کی نرمی دی جارہی ہے۔

زرعی ادویات پر ایکسائز ڈیوٹی میں کمی اور سیلز ٹیکس کی رعایت دی جانے کی توقع ہے۔چینی،مشروبات اور سیمنٹ پر ٹیکس اور ڈیوٹی بڑھانے کی تجاویز پیش کی گئی ہے۔