اسلام آباد:اپوزیشن نے پاناما پیپرزپرٹی اوآرزکا کچا چٹھہ کھولنے کا فیصلہ کرلیا۔ اپوزیشن کا کہنا ہے کہ حکومت کمیشن بنانے میں سنجیدہ نہیں۔

پانامہ پیپرزکی تحقیقات کے شرائط کار بنانے کیلئے کمیٹی آٹھ بار بیٹھی، درجنوں تجاویز اور جوابی تجاویز آئیں، لیکن طے کچھ نہ ہوسکا، اپوزیشن اب ان سب تجاویز کا تحریری بھانڈا پیر کو پھوڑے گی ، کیا معاملہ آخرمیں سڑکوں پر آنا ہے یا نہیں یا پھرکوئی اورراستہ یہ بھی پیر کو پتہ چل جائے گا۔

پانامہ بحران پر حکومت کی نیت وقت گزاری ہے یا نہیں لیکن تحریک انصاف کہتی ہے کہ حکومتی رویے نے ان کیلئے کوئی اور آپشن ہی نہیں چھوڑا۔ عوامی نیشنل پارٹی اورایم کیوایم اب بھی مذاکرات سے ہی معاملات حل کرنے کا پیغام دے رہی ہیں۔

حکومت اپنے موقف پر قائم رہنے کے درست قرار دیتے ہوئے اپوزیشن کو کو نقطہ نظرپرنظرثانی کا مشورہ دے رہی ہے۔پانامہ ٹی او آرکمیٹی کی مہلت ختم ہوچکی ہے، اپوزیشن صفوں کے کچھ باہمی اختلاف رائے کی وجہ سے حکومت کو لاحق مبہم امید پر کمیٹی تحلیل بھی نہیں کی گئی ، انتظار ہے تو بس اب پیر کا کہ، اپوزیشن کی پٹاری سے کیا برآمد ہوتا ہے۔