لاہور :وزیر قانون پنجاب رانا ثنا اللہ کا کہنا ہے کہ امجد صابری کے قتل اورکراچی میں ہونے والی حالیہ وارداتوں میں ملوث دہشت گردوں کا تعلق افغانستان سے ہے۔
لاہور میں میڈیا سے گفتکو کرتے ہوئے وزیر قانون پنجاب رانا ثنا اللہ کا کہنا تھا کہ کراچی میں چیف جسٹس کے بیٹے کے اغوا اور معروف قوال امجد صابری کے قتل کی وارداتوں میں افغانستان سے تعلق رکھنے والے دہشت کرد ملوث ہیں جن کا مقصد معاشرے میں خوف وہراس پھیلانا ہے۔ دہشت گردوں کی کارواؤں کے ساتھ ساتھ کچھ سیاسی رہنما بھی ملک میں انتشار پھیلانا چاہتے ہیں،انہیں قومی زمہ داری کا احساس کرنا چاہئے۔

سندھ رینجرز پر لگائے گئے الزامات کے حوالے سے ان کا کہنا تھا کہ نیب کو ان کے خلاف کاروائی کرنی چاہئے اور اگر ضرورت ہو تو نیب کو بہتر اور مضبوط ادارہ بنانے کے لئے قانون سازی بھی ہونی چاہئے۔ تاہم ان الزامات سے قطع نظر کراچی میں امن و امان کے حوالے سے رینجرز کی خدمات کا بھی اعتراف کیا جانا ضروری ہے۔رانا ثنااللہ کا مزید کہنا تھا کہ پنجاب میں اہم سیاسی، انتظامی اور عدالتی شخصیات کی سکیورٹی کو بھی ری وزٹ کیا جارہا ہے۔