کراچی:معروف قوال امجد صابری کے قتل کا مقدمہ شریف آباد تھانے میں درج کر لیا گیا ہے،تحقیقات کیلئے اعلیٰ سطح کی کمیٹی بھی تشکیل دیدی گئی۔

آئی جی سندھ اے ڈی خواجہ کا کہنا ہے کہ یہ قیاس آرائیاں اور اطلاعات بے بنیاد ہیں کہ امجد صابری کی جان کو خطرہ تھا اور پولیس اس حوالے سے آگاہ تھی، امجد صابری کے قتل میں ملوث مبینہ ملزمان کی نئی سی سی ٹی وی فوٹیج بھی سامنے آئی ہے۔

آج نیوز پر نشر ہونے والے بی بی سی کے پروگرام سیربین  سے گفتگو کرتے ہوئے انہوں نے کہا کہ پولیس سے امجد صابری ، ان کے کسی رشتہ یا دوست نے  کوئی شکایت نہیں کی۔

امجد صابری کے قتل کا مقدمہ  شریف آباد تھانے میں درج کر لیا گیا ۔مقدمے کے اندراج کے ساتھ ہی اعلیٰ سطح کی تحقیقاتی کمیٹی تشکیل دیدی گئی ہے،کمیٹی کے ارکان نے امجد صابری کے اہلخانہ سے ملاقات کی ،کمیٹی میں ڈی آئی جی ویسٹ ذوالفقار لاڑک، ایس ایس پی ویسٹ پیر محمد شاہ ،ایس ایس پی سینٹرل مقدس حیدر ، ایس ایس پی انویسٹی گیشن عرب مہر شامل ہیں

امجد صابری کے اہلخانہ سے بات چیت میں ڈی آئی جی ویسٹ کا کہنا تھا کہ مقدمہ درج ہونے کے بعد دائرہ تفتیش بڑھا دیا گیا ہےسی سی ٹی وی فوٹیج سے بھی مدد حاصل کی جا رہی ہے۔

انہوں نے یقین دہانی کرائی کہ ملزمان کو جلد قانون کی گرفت میں لایا جائے گادوسری جانب مبینہ قاتلوں کی نئی سی سی ٹی وی فوٹیج بھی سامنے آ گئی ہے۔

فوٹیج میں ملزمان کو امجد صابری کی گاڑی کا پیچھا کرتے دیکھا جا سکتا ہےموٹرسائیکل پرسوار2مبینہ ملزمان 10 نمبرفلائی اوورکے نیچے امجد صابری کی گاڑی کے تعاقب میں ہیں،مموٹرسائیکل چلانے والا شخص پینٹ شرٹ پہنے اورہیلمٹ لگائے ہےجبکہ پیچھےبیٹھا شخص شلوارقمیض میں ملبوس ہے۔

مبینہ ملزمان کےواردات کے بعد فرارکے مناظرایک دوسرے سی سی ٹی وی کیمرے نے محفوظ کرلئےجبکہ ایک اورسی سی ٹی وی فوٹیج میں ایک موٹرسائیکل سوارنوجوان کو بھی دیکھا جاسکتا ہے۔

تحقیقاتی ذرائع نے شبہ ظاہرکیا ہے کہ فوٹیج میں نظرآنے والا مشکوک نوجوان ملزمان کا ساتھی ہوسکتا ہےجوانہیں کورفراہم کررہا ہو۔