اسلام آباد:پاکستانی سیکریٹری خارجہ اعزاز چوہدری کا کہنا ہے کہ افغانستان سے ملحقہ سرحد کو دہشت گردی سے پاک اورہر لحاظ سے محفوظ بنانے کیلئے سخت انتظامات کررہے ہیں۔

امریکی نمائندہ خصوصی برائے پاکستان و افغانستان رچرڈ اولسن اور پاکستانی سیکریٹری خارجہ اعزاز چوہدری کے درمیان اسلام آباد میں ملاقات ہوئی۔ جس میں علاقائی سلامتی کی صورتحال اور افغان امن و استحکام پر تفصیلی تبادلہ خیال کیا گیا۔

سیکریٹری خارجہ اعزاز چوہدری نے رچرڈ اولسن کو بتایا کہ پاک افغان سرحد کو دہشت گردی سے پاک کرنے اور سیکیورٹی بہتر بنانے کے لیے سخت انتظامی اْمور پر یقین رکھتے ہیں،انہوں نے مزید کہا کہ سرحدی انتظام اور سلامتی کے اْمور پرافغانستان کیساتھ اعلیٰ سطحی مشاورتی میکانزم بھی تشکیل دیا ہے۔

اِس موقع پر امریکی نمائندہ خصوصی رچرڈ اولسن نے افغان امن و استحکام کیلئے پاکستانی کاوشوں کو سراہا۔ ان کا کہنا تھا کہ بین الاقوامی برادر ی پاکستان کی جانب سے پینتس سال تک افغان مہاجرین کی میزبانی کو کبھی نہیں بھول سکتی ۔اِس موقع پر دونوں ممالک نے دوطرفہ سطح پرتجارت، سرمایہ کاری، تعلیم، صحت اور توانائی کے شعبوں میں تعاون جاری رکھنے پر اتفاق کیا۔