اسلام آباد:امریکی سینیٹر جان میک کین کا کہنا ہے کہ میران شاہ کا دورہ کرکے خوشگوار حیرت ہوئی۔

پاکستان اور امریکی وفد کے درمیان اسلام آباد میں دفتر خارجہ میں ملاقات ہوئی۔پاکستانی وفد کی صدارت مشیرخارجہ سرتاج عزیز اور امریکی وفد کی قیادت جان میک کین نے کی۔

ملاقات میں خطے کی صورتحال اور پاکستان کے دفاعی معاملات پر بھی بات چیت ہوئی۔

سینیٹر جان میک کین کا کہنا تھا کہ میران شاہ کا دورہ کرکے انہیں خوشگوار حیرت ہوئی، اور وہ میران شاہ میں امن و امان کی صورتحال دیکھ کر بہت مطمئن ہیں۔

ان کا کہنا تھا کہ وہ مثبت پیغام لے کر جا رہے ہیں، ساتھ ہی یہ بھی کہا کہ امریکا اور پاکستان کو مل کر دہشتگردی کا مقابلہ کرنا ہے، امریکا پاکستان کی دفاعی ضروریات سے آگاہ ہے۔

سرتاج عزیز نے کہا کہ امریکی وفد سے بات چیت مثبت اور تعمیری رہی، ایجنڈے میں دوطرفہ تعلقات میں حائل رکاوٹیں دور کرنے سمیت انسداد دہشتگردی کی جنگ میں تعاون کے فروغ پر بھی بات چیت ہوئی۔