پشاور:عیدالفطر کے موقع پر پشاور پولیس نے سیکیورٹی پلان ترتیب دے دیا، شہر بھر میں 4 ہزار سے زائد پولیس اہلکار تعینات کئے جائیں گے۔

عید الفطر پر کسی بھی ناخوشگوار واقعے سے بچنے کے لئے پشاور پولیس نے سیکیورٹی پلان مرتب کر لیا ہے۔عید گاہ پر سیکیورٹی کے لئے 140 پولیس اہلکار تعینات کئے گئے ہیں۔

 شہر بھر کی 400 مساجد پر بھی سیکیورٹی بڑھادی گئی ہے، ہر مسجد پر 3 پولیس اہلکار سادہ کپڑوں میں جبکہ 2 باوردی ڈیوٹی سرانجام دیں گے، پولیس کو بم ڈسپوزل یونٹ، لیڈیز پولیس اور سراغ رساں کتوں کی معاو نت بھی حاصل ہوگی، دس مسجدوں کے لئے ایک پولیس موبائل گشت کرتی رہے گی۔

  تفریحی مقامات کی سیکورٹی کے لئے 3 ہزار پولیس اہلکار تعینات کئے جائیں گے۔ ہر میلے کے لئے 40 پولیس اہلکار اپنے فرائض انجام دیں گے۔

 معروف تجارتی بازار صدر، حیات آباد اور اندرون شہر سیکورٹی ناکوں کی تعداد میں بھی اضافہ کر دیا گیا ہے۔