اسلام آباد:وفاقی وزیر ریلوے خواجہ سعد رفیق کا کہنا تھا کہ رائل پام کے حوالے سے لاہور ہائیکورٹ کے فیصلے کے خلاف سپریم کورٹ سے رجوع کرنے کیلئے مشاورت کر رہے ہیں۔

ریلوے کی اراضی پر قائم رائل پام کنٹری کلب میں میڈیا سے گفتگو کرتے ہوئے وفاقی وزیر ریلوے خواجہ سعد رفیق کا کہنا تھا کہ کلب انتظامیہ پینسٹھ کروڑ روپے کی نادہندہ ہے اور دو سال سے کرایہ بھی ادا نہیں کیا گیا۔ انتظامیہ نے ملی بھگت کر کے معاہدے کی رقم کو اکیس لاکھ ساٹھ ہزار روپے میں تبدیل کیا جبکہ ریلوے کے ریکارڈ سے اصل معاہدہ بھی چوری کر لیا گیا ہے۔

سعد رفیق کا کہنا تھا کہ ہم نے اسٹیٹس کو پر ہاتھ ڈالا ہے۔ نادہندگان ریلوے کے خلاف پراپیگنڈہ کر رہے ہیں، بعض لوگ چاہتے ہیں کہ گالف کلب کی گھاس تک خراب نہ ہو چاہے ریلوے ڈوب جائے۔ان کا کہنا تھا کہ عدالتی حکم کے مطابق کلب کا نظام چلانے کیلئے تین رکنی کمیٹی تشکیل دے دی گئی ہے۔ نیب رائل پام کنٹری کلب کی تحقیقات کر رہی ہے اور انہیں ضروری ریکارڈ مہیا کر دیا گیا ہے۔ چیف جسٹس پاکستان اور چیف جسٹس لاہور ہائیکورٹ سے گزارش ہے کہ ہماری فریاد سنیں اور داد رسی کی جائے۔