بانی پاکستان کے یوم ولادت کے سلسلے میں اسلام آباد کے پاکستان مونومنٹ میوزیم میں کیک کاٹا گیا۔ شہریوں نے میوزیم میں موجود قائد اعظم کے مجسموں میں خوب دلچسپی کا اظہار کیا۔

بابائے قوم کے یوم ولادت کے سلسلے میں پاکستان مونومینٹ میوزیم میں تقریب کا انعقاد کیا گیا۔ شہریوں کی بڑی تعداد نے تقریب میں شرکت کی۔ اس موقع پر سماجی کارکن فوزیہ سعید کا کہنا تھا کہ ہمیں قائداعظم کے دیئے ہوئے ایمان اتحاد اور تنظیم کے اصولوں پر چلتے ہوئے ملک و قوم کی ترقی کے لئے مل جل کر کام کرنا چاہیے۔

میوزیم میں قائد کی زندگی کے مختلف پہلووں کو مجسموں کے ذریعے اجاگر کیا گیا۔ بطور وکیل، بطور سیاستدان، مذاکرات کی میز پر ان کا کردار اور محمد علی جناح کی ذاتی زندگی پر مبنی مجسمے شہریوں کی توجہ کا خاص مرکز رہے۔ شہریوں نے نہ صرف قائد کو خراج عقیدت پیش کیا بلکہ والدین اپنے بچوں کو قائد کے بارے میں شعور بھی دیتے رہے۔

بانی پاکستان کا یوم ولادت جہاں قومی دن ہے وہیں یہ تجدید عہد وفا کا دن ہے کہ جب قوم قائد سے کیئے پاکستان کی ترقی و سربلندی کے وعدے کو دہراتی ہے۔