کراچی:ڈاکٹر عاصم حسین کیس میں آج اہم پیش رفت ہوئی ، کیس میں ملوث تین اہم ملزمان کو ضمانت منسوخ ہونے پر عدالت میں ہی گرفتار کرلیا گیا۔

کراچی کی انسداد دہشتگردی عدالت میں کیس کی سماعت ہوئی،ایم کیوایم رہنما وسیم اختر، رؤف صدیقی اور پاک سرزمین پارٹی کے انیس قائم خانی پیش ہوئے۔تینوں نامزد ملزمان نے ضمانت میں توثیق کی درخواست دائر کرائی۔جسے عدالت نے یکسر مسترد کردیا۔درخواست ضمانت مسترد ہونے پر عدالت نے تینوں ملزمان کی گرفتاری کا حکم دیا۔

پیپلزپارٹی کے رہنما عبدالقادر پٹیل بھی عدالت پہنچے،تاہم وہ عدالت کے باہر سے ہی اپنی گاڑی میں بیٹھ کر چلے گئے۔

گرفتاری کے حکم پر وسیم اختر اور رؤف صدیقی نے ہائیکورٹ سے رجوع کرنے کا ارادہ کیا،اور کہا کہ عدالت نے مجبوری میں یہ حکم سنایا۔

وسیم اختر اپنے وکلاء کے ہمراہ ہائیکورٹ جانے نکلنے لگے تو عدالت کے دروازے بند کردیئے گئے۔اس دوران پولیس اہلکاروں سے وسیم اختر اور ان کے وکلاء کے درمیان تلخ کلامی بھی ہوئی۔

گرفتاری کی خبر سن کر ایم کیوایم اور پاک سرزمین پارٹی کے رہنما عدالت کے باہر پہنچ گئےاور اس گرفتاری کو سیاسی قرار دیا۔

پولیس کی بھاری نفری موقع پر پہنچی اور عدالت میں بکتر بند گاڑی لے جائی گئی۔وسیم اختر، رؤف صدیقی اور انیس قائم خانی کو بکتر بند گاڑی میں سینٹرل جیل منتقل کردیا گیا۔

پاک سرزمین پارٹی کے رہنما مصطفیٰ کمال، اور ایم کیو ایم دیگر رہنما بھی سینٹرل جیل کے باہر موجود تھے۔

کیس کی آئندہ سماعت 3 اگست تک کے لئے ملتوی کردی گئی۔