اسلام آباد:وزیراعظم نوازشریف نے کہا ہے کہ کشمیریوں کو کبھی تنہا نہیں چھوڑیں گے۔ مقبوضہ کشمیر میں آزادی کی لہر تھمنے والی نہیں، جب قومیں بیدار ہوتی ہیں تو ان کا راستہ نہیں روکا جا سکتا۔

دنیا بھرمیں کشمیریوں سے اظہاریکجہتی کیلئے یوم سیاہ کے موقع پروزیراعظم نوازشریف نے اپنے پیغام میں کہا کہ مقبوضہ کشمیرمیں انسانی حقوق کی خلاف ورزی ، انسانی جان کی بے توقیری اور خواتین کی بے حرمتی کے واقعات نے دنیا بھرکو شدید اضطراب میں مبتلا کردیا ہے۔

کسی ریاست کو یہ اجازت نہیں کہ وہ سیاسی مفاد کے نام پر انسانیت کے اصولوں کو پامال کرے، انہوں نے کہا کہ کشمیرکو بھارت کا داخلی مسئلہ تسلیم نہیں کیا جا سکتا۔

 وزیراعظم کا کہنا تھا کہ عالمی برادری اس بات کو مدنظر رکھے کہ کشمیرکے مسئلے میں پاکستان ایک فریق ہے۔ اگر کشمیریوں کے ساتھ ظلم روا رکھا جائے گا، تو پاکستان خاموش نہیں رہے گا۔

انہوں نے مزید کہا کہ بھارت لوگوں کی آواز کو دبا نہیں  سکتا، آزمائش کی اس گھڑی میں پاکستان کشمیری بھائیوں کے ساتھ ہے۔ انہیں کبھی تنہا نہیں چھوڑیں گے۔