لاہور:سپریم کورٹ نے پنجاب میں بچوں کے اغواء اور گمشدگی ازخود نوٹس میں 10گمشدہ بچوں کی بازیابی کے لیے کی گئی تحقیقات کی رپورٹ طلب کرتے ہوئے قرار دیا کہ یہ ایک حساس معاملہ ہے پولیس رپورٹ پر اسے ختم نہیں کیا جا سکتا۔

سپریم کورٹ رجسٹری لاہور میں جسٹس ثاقب نثار اور جسٹس اقبال حمید الرحمٰن پر مشتمل بنچ نے از خود نوٹس کی سماعت کی،اسسٹینٹ انسپکٹر جنرل پولیس کرائم نے بچوں کے اغواء اور گمشدگی کی رپورٹ پیش کرتے ہوئے عدالت کو بتایا کہ 2015اور 16میں بلترتیب 1208اور 798بچوں کی گمشدگی رپورٹ ہوئی،جن میں سے صرف ترانوے بچے ابھی تک برامد نہیں ہو سکے۔

اغواء کے 4 مقدمات کے ملزمان گرفتار کر کے رقم برامد کر لی گئی ہے۔لاہور،راولپنڈی،فیصل آباد،بہاولنگر اور بہاولپور سے بچوں کے گمشدہ یا اغواء ہونے کے زیادہ کیسز رجسٹر ہوتے ہیں۔

جسٹس ثاقب نثار نے ریمارکس دیئے کہ لوگوں کی جان و مال کی حفاظت کرنا حکومت کی ذمہ داری ہے،اگر وہ نوٹس نہ لے تو عدلیہ کو مداخلت کرنا پڑتی ہے،گمشدہ بچوں کے والدین ساری زندگی سو نہیں سکتے،پولیس کی رپورٹ پر اس معاملے کو ختم نہیں کر سکتے۔

سپریم کورٹ کی سابق صدر عاصمہ جہانگیر نے کہا کہ بچوں کو قتل کرنے سے زیادہ بیرون ملک سمگل کیا جاتا ہے۔

عدالت نے پولیس سے ترانوے بچوں میں سے 10 کی برآمدگی کے لیے کی گئی تحقیقات پر تفصیلی رپورٹ طلب کرتے ہوئے سماعت 3 اگست تک ملتوی کر دی۔