اسلام آباد: پاکستان نژاد برطانوی سامعہ کی پوسٹ مارٹم رپورٹ میں انکشاف ہوا ہے کہ مقتولہ کی گردن پر گہرے نشانات تھے، ناک سے خون اور منہ سے جھاگ آرہے تھے، سامعہ کے شوہر نے پوسٹ مارٹم رپورٹ دوبارہ کروانے کا مطالبہ کردیا۔ وزیراعلیٰ پنجاب نے کیس کی شفاف تحقیقات کیلئے انکوائری کمیٹی تشکیل دے دی ہے جو باہتر گھنٹے میں رپورٹ پیش کرے گی۔

پاکستانی نژاد برطانوی خاتون سامعہ کی پوسٹ مارٹم رپوٹ آنے کے بعد کیس کی سنسنی خیزی میں مزید اضافہ ہوگیا۔رپورٹ میں انکشاف ہوا ہے کہ سامعہ کی گردن پر انیس سینٹی میٹر کے گہرے نشانات تھے۔اسکے علاوہ مقتولہ کی ناک سے خون اور منہ سے جھاگ نکل رہے تھے،ان انکشافات کے بعد سامعہ کی موت کے حوالے سے شک کے سائے مزید گہرے ہوگئے۔

دوسری جانب کیس سے منسوب کردار بھی منظر عام پر آرہے ہیں۔اسلام آباد میں پریس کانفرنس کرتے ہوے سامعہ کےشوہرمختار کاظم کا کہنا تھا کہ پوسٹ مارٹم رپورٹ سے واضح معلوم ہوتا ہے اسے گلا دبا کر قتل کیا گیا۔

مختار کاظم نے کہا کہ شادی پر سامعہ کے والدین خوش نہیں تھے۔انھوں نے الزام لگایا کہ کا سامعہ کے والد چوہدری شاہد اسے بھی قتل کرنا چاہتے ہیں۔ کیس کی شفاف تحقیقات کیلئے وزیراعلیٰ پنجاب نے ڈی آئی جی ابوبکر خدا بخش کی سربراہی میں انکوائری کمیٹی تشکیل دیدی ہے جو باہترگھنٹے میں رپورٹ پیش کرے گی۔