برسلز،نیویارک:مقبوضہ کشمیر میں نہتے کشمیریوں پرمظالم کیخلاف بالآخرعالمی برادری جاگ  اٹھی۔ امریکا اور یورپی یونین نے کشمیر کی سنگین صورتحال پر تشویش کا اظہار کرتے ہوئے فریقین سے پرامن حل تلاش کرنے کی اپیل کردی۔

مقبوضہ کشمیر میں  بھارتی فوج  نے ظلم کی انتہا کردی۔رواں ماہ درجنوں بے گناہ کشمیریوں کو شہید کیا گیا۔

بھارتی مظالیم  کیخلاف اب عالمی برادری  بھی بولنے پر مجبور ہوگئی ہے۔ امریکی محکمہ خارجہ کے ترجمان جان کربی نے واشنگٹن میں پریس بریفنگ میں کشمیر کی سنگین صورتحال پر اظہار تشویش کیا۔دوسری جانب یورپی یونین نے بھی مقبوضہ کشمیر میں بے گناہوں کے قتل عام پر تشویش کا اظہارکیا ہے۔

یورپی یونین کے ترجمان مائیکل مان نے  بھارتی فوج کے ہاتھوں شہید والے کشمیریوں کے لواحقین سے اظہار یکجہتی کیا۔ انہوں نے کہا کہ بھارت اور پاکستان کو مسئلہ کشمیر کے حل کیلئے مذاکراتی عمل شروع کرنا چاہئے اور اس عمل میں کشمیریوں کی قیادت کو بھی شامل کرنا چاہئے۔

مائیکل مان نے کہا کہ یورپی یونین کی یہ خواہش ہے کہ بھارت اور پاکستان کمشیریوں کے معاملے پر مفاہمتی راہ اختیارکریں۔ یورپی یونین کمشیر کی صورتحال پر نظر رکھے ہوئے اور بھارت کو ریاست میں قیام امن کیلئے طاقت کے زور سے گریز کرنا پڑے گا۔