اسلام آباد:بلیک لسٹ امریکی شہری پاکستان میں داخل ہونے پر گرفتار۔ویزہ جاری کرنے والی خاتون افسراور ایف آئی اے کے دواہلکاروں کیخلاف مقدمہ درج ۔ایک کو گرفتار کرلیا گیا۔

میتھیو نام کا  امریکی شہری  جسے 2011 میں بلیک لسٹ کرکے پاکستان بدر کردیا گیا تھا ۔ترک ایئرلائن کے ذریعے لینڈنگ کارڈ پر غلط کوائف درج کرکے اسلام آباد ایئرپورٹ میں داخل ہوا ۔مشکوک اور بلیک لسٹ امریکی شہری کے اسلام آباد ایئرپورٹ میں داخل ہونے پر ایف آئی اے حرکت میں آگئی اور فوری کاروائی کرکے میتھیو کو گرفتار کرکے امیگریشن سیل منتقل کردیا۔ایئرپورٹ سے کلئیر کرنے والے ایف آئی اے کے ملازم باپ بیٹا کیخلاف مقدمہ درج کرتے ہوئے ڈیوٹی پر موجود اہلکار احتشام الحق  کوگرفتار کر لیا گیا جبکہ اسکے والد سب انسپکٹر راجہ آصف کی گرفتاری کیلئے چھاپے مارے جا رہے ہیں ۔

ایف آئی اے حکام کے مطابق ایئرپورٹ پر ایف آئی اے کے سب انسپکٹر راجہ آصف اور اسکے بیٹے احتشام الحق کی مبینہ غفلت  سے امریکی شہری  پاکستان داخل ہوا ۔بلیک لسٹ ہونے کے باوجود ہوسٹن میں پاکستانی مشن سے ویزہ جاری کرنے والی افسر سعدیہ الطاف قاضی کیخلاف بھی مقدمہ درج کر لیا گیا ہے ۔

ڈی جی ایف آئی اے نے معاملے کا نوٹس لیتے ہوئے  ڈائریکٹر ایف آئی اے کو مکمل تفتیش کی ہدایت کردی ہے ۔ایف آئی اے حکام کا کہنا ہے کہ معاملے کے اصل کردار کو بھی بے نقاب کریں گے۔

‎۔