کراچی:وزیراعلیٰ سندھ سید مراد علی شاہ نے رات گئے شہرکے مختلف علاقوں کا دورہ کرکےصفائی ستھرائی کاجائزہ لیا،کچرہ دیکھ کر برہم ہوگئے۔

وزیراعلیٰ سندھ سید مراد علی شاہ نے رات گئے کراچی شہر کے مختلف علاقوں کا دورہ کیا،ان کے ہمراہ 20 گاڑیوں کا قافلہ بھی موجود تھا۔

سید مراد علی شاہ نے دورے کا آغاز طارق روڈ سے کیا،صفائی ستھرائی کے کاموں کا جائزہ لیا،شاہ فیصل کالونی سے ہوتے ہوئے ملیر قائد آباد پہنچ گئے، جہاں کچرے کے ڈھیر دیکھ کر برہم ہوگئے اور موقع پر موجود عملے کی خوب سرزنش کی۔

اس موقع پر انہوں نے کہا کہ جوکام نہیں کرے گا اسے برطرف کردیا جائے گا،وزیراعلیٰ سندھ نے عزیزآباد اور حسین آباد کے علاقوں کا بھی دورہ کیا۔

 سید مراد علی شاہ نے اپنی کابینہ کے ہمراہ حسین آباد میں ریسٹورنٹ پر مٹن کراہی کھائی اور اپنے پیسوں سے جشن آزادی کا بیج خریدا اور جھنڈا لگایا۔وزیربلدیات سندھ اور دیگراعلیٰ شخصیات بھی وزیراعلیٰ کے ہمراہ تھیں۔