کراچی:سندھ ہائیکورٹ نے جعلی ڈگری کیس میں ایگزیٹ کے سی ای اوشعیب شیخ سمیت 14 ملزمان کی ضمانت منظورکرلی۔ ملزمان نے سیشن کورٹ کے فیصلے کے خلاف ضمانت کی اپیل دائرکی تھی۔

سندھ ہائیکورٹ میں ایگزیٹ جعلی ڈگری کیس کےملزمان کی درخواست ضمانت کی سماعت ہوئی۔ملزمان کے وکیل شوکیت حیات ایڈوکیٹ نےموقف اختیارکیا کہ ملزمان 15 ماہ سے جیل میں ہیں تاہم مقدمے میں کوئی پیش رفت نہ ہوسکی۔

استغاثہ کسی ایک جعلی ڈگری کی کاپی عدالت میں پیش نہ کرسکی نہ ہی کوئی شکایت کنندہ سامنےآیا۔تفتیش مکمل ہوگئی لیکن کیس نہیں چلایا گیا اورنہ ملزمان پرفرد جرم عائد ہوئی۔

وکیل صفائی کا کہنا تھا کہ دھوکہ دہی اورجعلسازی کے مقدمے میں ضمانت ملزمان کا قانونی حق ہےلہذاضمانت منظورکی جائے۔

جس پرعدالت نے شعیب شیخ سمیت 14 ملزمان کی ضمانت 50،50 لاکھ روپے مچلکوں کے عوض منظورکرلی۔

عدالت کے باہرمیڈیا سے گفتگومیں شوکیت حیات ایڈوکیٹ کا کہنا تھا کہ ضمانتی مچلکے جمع کرانے پروقاص عتیق سمیت 13 ملزمان آج رہا ہوجائیں گے جبکہ شعیب شیخ کی رہائی میں منی لانڈرنگ کیس حائل ہے۔

منی لانڈرنگ  کیس کالعدم قرارددینے کیلئے درخواست دائر کررکھی ہے درخواست کا فیصلہ کل متوقع ہے۔فیصلہ حق میں آیا توشعیب شیخ رہا ہوجائیں گے بصورت دیگرضمانت دائرکریں گے۔