اسلام آباد:اسپیکر قومی اسمبلی نے وزیراعظم نوازشریف، عمران خان اور جہانگیر ترین کے خلاف تمام 6ریفرنس مستردکرنے کا فیصلہ کرلیا ہے، آئندہ 15روز میں باضابطہ اعلان کردیا جائےگا۔

اسپیکر قومی اسمبلی سردار ایاز صادق کے پاس وزیراعظم نوازشریف کی نااہلی کےلئے 4 جبکہ  عمران خان  اور جہانگیر ترین کے خلاف ایک ایک ریفرنس دائر کیا گیا ہے۔

 بزنس ریکارڈر کی رپورٹ کے مطابق ،اسپیکر نے ایک قانونی مشاورت کی بنیاد پر تمام ریفرنسز مسترد کرنے کا فیصلہ کرلیا ہے، اسپیکر اپنے فیصلے کے بارے میں الیکشن کمیشن کو بھی خط لکھ کر آگاہ کریں گے۔

 وزیراعظم کے خلاف ریفرنس پاناما پیپرز میں نام آنے جبکہ عمران خان اور جہانگیر ترین کے خلاف اثاثے چھپانے اور غلط بیانی پر آرٹیکل 62 اور 63 کے تحت دائر کیے گئے ہیں۔

 ذرائع کا کہنا ہے کہ ریفرنسز میرٹ سے زیادہ سیاسی بنیادوں پر دائر کیے گئے ہیں، ان میں قانونی کارروائی کےلئے کوئی وزن نہیں ہے۔ ریفرنس مسترد کرنے کےلئے ضابطے کی کارروائی مکمل کی جا چکی ہے، آئندہ دو ہفتے میں بس اعلان کردیا جائےگا۔

 فریقین کو فیصلے کے خلاف سپریم کورٹ جانے کا حق حاصل ہوگا، پاکستان تحریک انصاف ، جماعت اسلامی اور سابق چیف جسٹس افتخار محمد چوہدری پہلے ہی عدالت جانے کا اعلان کر چکے ہیں۔

 ذرائع کے مطابق ،عمران خان اور جہانگیر ترین کے خلاف ن لیگ کا ریفرنس ایک بہت بڑی غلطی تھی جس کی وجہ سے پی ٹی آئی کو بھی جوابی ریفرنس دائر کرنے کا موقع ملا ۔