حافظ آباد:حافظ آباد میں ایک سال قبل لاپتہ ہونے والے بچے کا معمہ حل ہوگیا، قاتل باپ نے جائیداد کی لالچ میں اپنے لخت جگر کو قتل کرکے لاش نہرمیں پھینک دی تھی۔

حافظ آباد کی تحصیل پنڈی بھٹیاں کےعلاقے جہانگیر پورہ میں ایک سال قبل دوسری جماعت کا طالب علم شہروز اسکول سے گھرواپس نہ آیا، شہروز کے اہلخانہ نے  گمشدگی کی ایف آئی آر تھانہ سٹی پنڈی بھٹیاں میں درج کروائی۔

لیکن بچے کے لاپتہ ہونے کا بھانڈا اس وقت پھوٹا جب اس کے والد عمر دراز کااپنے گھروالوں سے جھگڑا ہوا۔

والد عمر دراز نے گھر والوں سے جائیداد میں حصہ مانگا،تو گمشدہ بچے کے دادا ریاست علی نے اس شرط پر جائیداد میں حصہ دینے کی یقین دہانی کرائی کہ پہلے اس کا پوتا شہروز گھر واپس آئے۔

جھگڑے کے دوران ملزم عمردراز نے انکشاف کیا کہ اس نے شہروز کو قتل کرکے لاش نہر میں پھینک دی تھی، ملزم کے اعتراف کے بعد پولیس نے عمردراز کو گرفتار کرلیا۔

 دوران تفتیش ملزم نےسنسنی خیز انکشافات کرتے ہوئے بتایا کہ وہ تین سال قبل اپنی تین سالہ بیٹی اقراء کو بھی نہر میں ڈوبا کر قتل کرچکا ہے۔