کراچی:ایم کیو ایم کی کارکنان کی گرفتاریوں کے خلاف تادم مرگ بھوک ہڑتال چھٹے روز میں داخل ہوگئی۔ سینئر رہنماؤں سمیت بڑی تعداد میں خواتین اور مرد کارکنان بھی بھوک ہڑتال میں شامل ہیں۔

کراچی میں پریس کلب پر ایم کیو ایم کی جانب سے اتوار کو بھی تادم مرگ بھوک ہڑتال کا سلسلہ جاری رہا۔ایم کیو ایم کا مطالبہ ہے کہ انکے کارکنان کی غیر قانونی اور غیرآئینی گرفتاریوں کو فوری طور پر بند کیا جائے اور انہیں سیاسی سرگرمیوں کا حصہ بننے دیا جائے ۔

سینئیررہنمامحمد حسین کا کہنا تھا کہ جب تک انکے مطالبات پورے نہیں ہوجاتے یہ ہڑتال جاری رہے گی،بھوک ہڑتال کی وجہ سے کچھ کارکنان کی حالت غیرہوگئی جنہیں فوری طورپرطبی امداد دی گئی۔

سابق نائب ناظمہ کراچی نسرین جلیل کا کہنا تھا کہ گزشتہ 3 برس سے انہیں دیوار سے لگانے کی کوشش کی جارہی ہے۔

گزشتہ روز اسپیکرسندھ اسمبلی آغا سراج درانی نے بھوک ہڑتالی کیمپ کا دورہ کیا تھا اور مظاہرین کے جائز مطالبات کی حمایت کی تھی۔