کراچی:کراچی میں ایم کیو ایم کے کارکنوں کی ہنگامہ آرائی کے بعد آج شہر میں کاروبار زندگی معمول کے مطابق جاری ہے۔ گزشتہ روز ایم کیو ایم کے قائد کے پاکستان مخالف خطاب کے بعد کارکنوں نے ہنگامہ آرائی کی اور میڈیا ہاؤسز پر حملہ کیا۔

کراچی میں نظام زندگی معمول کے مطابق رواں دواں ہے۔تعلیمی ادارے، پیٹرول پمپس اور کاروباری مراکز کھلے ہوئے ہیں۔سڑکوں پر پرائیوٹ اور پبلک ٹرانسپورٹ بھی موجود ہے۔

شہر میں صبح ہوتے ہی ایم کیو ایم کے کارکنوں کی ہنگامہ آرائی سے پیدا شدہ غیر یقینی صورتحال ختم ہوگئی۔

گزشتہ روز بھوک ہڑتالی کیمپ کے چھٹے روز ایم کیو ایم کے قائد نے احتجاج ختم کرنے کا اعلان کیااور ساتھ ہی میڈیا ہاؤسز کے سامنے احتجاج کرنے کی ہدایت بھی کی۔

کارکن احتجاج کیلئے اے آر وائی اور نیو ٹی وی کے دفاتر پہنچے لیکن صورتحال اچانک تبدیل ہوگئی۔مشتعل افراد نے اے آر وائی کے دفتر میں گھس کر توڑ پھوڑ شروع کردی،مشتعل افراد کا ٹولہ زینب مارکیٹ کے اطراف ہنگامہ آرائی کرنے لگا۔

ہوائی فائرنگ ، پتھراؤ اور جلاؤ گھیراؤ نے علاقہ میدان جنگ بن گیا،صورتحال خراب ہوئی تو پولیس اور رینجرز کو طلب کیا گیاجس کے بعد لاٹھی چارج، شیلنگ اور ہوائی فائرنگ کا سلسلہ شروع ہوا۔

فائرنگ اور ہنگامہ آرائی سے ایک شخص ہلاک اور متعدد زخمی ہوگئے،رینجرز اہلکاروں نے موقع پر پہنچ کر مشتعل افراد کو پکڑنا شروع کیا،کراچی پریس کلب کے باہر ایم کیوایم کا احتجاجی کیمپ بھی رینجرز نے اکھاڑ دیا۔