لاہور:پنجاب اسمبلی کی نشست پی پی 232بورے والاکے ضمنی الیکشن کیلئے پولنگ کا عمل جاری ہے۔حلقے کے 31پولنگ اسٹیشنز کو حساس قرار دیا گیا ہے۔

ضلع وہاڑی کی تحصیل بورے والا کے حلقہ پی پی 232 کے ضمنی انتخاب کیلئے پولنگ کا عمل کا آج صبح 8 بجے سے جاری ہے۔حلقے کے 1 لاکھ 91 ہزار 92 ووٹرز کیلئے 157 پولنگ اسٹیشنز قائم کیے گئے ہیں۔جن میں اکتیس کو انتہائی حساس قرار دیا گیا ہے۔

پولنگ کے عمل کیلئے سیکورٹی کے انتہائی سخت انتظامات کیے گئے ہیں جبکہ کسی بھی ناخوشگوار واقعے کے پیش نظر فوجی اہلکار بھی حلقے میں موجود رہیں گے۔پولنگ کا عمل شام 5 بجے تک بغیر کسی وقفے کے جاری رہے گا۔

پی پی 232 کے آج ہونےوالے ضمنی انتخاب کیلئے کل گیارہ امیدوار مدمقابل ہیں۔جن میں مسلم لیگ نون کے یوسف کسیلیہ اور تحریک انصاف کی عائشہ نذیر جٹ میں کانٹے دار مقابلہ متوقع ہے۔

واضح رہے کہ یہ نشست دوہزار تیرہ کے عام انتخابات میں آزاد ٹکٹ پر کامیابی حاصل کرنیوالے یوسف کسیلہ کو نااہل قراردئیے جانے پر خالی ہوئی تھی۔