کراچی :محکمہ داخلہ سندھ نے پولیس کی درخواست پر میئر کراچی وسیم اختر سے سانحہ بارہ مئی سمیت دیگر مقدمات سے متعلق تفتیش کیلئے جے آئی ٹی تشکیل دے دی ہے ۔ جس کے بعد کراچی کے منتخب میئر کیلئے یہ ایک اور مشکل مرحلہ ہے۔

ایم کیو ایم کی مشکلات میں کمی کی بجائے مسلسل اضافہ ہو رہا ہے۔ساڑھے چھ سال بعد خدا خدا کر کے کراچی کا میئر بنا۔میئر کو پہلا جھٹکا لگا سلاخوں کے پیچھے قید ہونے کا اوراسی قید کے دوران وسیم اختر نے عہدے کا حلف بھی لیااور اب سانحہ بارہ مئی کی تفتیش کیلئے جے آئی ٹی کی تشکیل کادوسرا شاک لگا۔

ذرائع کے مطابق محکمہ داخلہ نے میئر کراچی وسیم اختر سے تفتیش کیلئے پانچ رکنی جے آئی ٹی تشکیل دے دی، ٹیم میں رینجرز اور پولیس کا گریڈ  اٹھارہ کا ایک ایک افسر بھی شامل ہوگا،ٹیم میں حساس اداروں کے تین افسران کو بھی شامل کیا جائے گا،ٹیم وسیم اختر سے تفتیش کر کے سات روز میں رپورٹ محکمہ داخلہ کو ارسال کرے گی۔

پولیس نے وسیم اختر کی گرفتاری کے بعد محکمہ داخلہ سے جے آئی ٹیم تشکیل دینے کی درخواست کرتے ہوئے دعوٰی کیا تھا کہ وسیم اختر سانحہ بارہ مئی میں ملوث ہونے کا اعتراف کر چکے ہیں۔