مردان :مردان کچہری کے گیٹ پر خودکش بم دھماکے میں وکلا ءاور سیکیورٹی اہلکاروں سمیت 13افراد جاں بحق جبکہ 50افراد زخمی ہوئے ہیں۔

خیبرپختونخوا میں خونی صبح کا یہ دوسرا دھماکا تھا، خودکش حملہ آور نے پہلے ضلع کچہری مردان کے گیٹ پر دستی بم پھینکا، مقصد بار روم تک پہنچنا تھا لیکن بہادر پولیس اہکار جنید نے حملہ آور کو روکا اور اسے گولی ماردی، گولی لگنے کے بعد حملہ آور نے خود کو دھماکے سے اڑا دیا، کچہر گیٹ دھماکے، چیخوں اور فائرنگ سے گونج اٹھا، ہر طرف افراتفری پھیل گئی۔

ڈی پی اومردان فیصل شہزاد کا کہنا ہے کہ خود کش حملہ آور نے7 سے 8کلو وزنی خود کش جیکٹ پہن رکھی تھی ، پولیس اہلکارجنید نے اپنی جان کا نذرانہ دے کر خود کش حملہ آور کو آگے بڑھنے سے روکا۔بہادر پولیس اہلکارجنید نےجراتمندی کا مظاہرہ کرتے ہوئے کئی قیمتی زندگیوں کو ضائع ہونے سے بچالیا۔

جاں بحق افراد میں 3 وکلاء ، 4 پولیس اہلکار اور باقی عام شہری ہیں، وزیرصحت خیبرپختونخوا شہرام ترکئی نے کہا کہ پولیس اہلکاروں کی بہادری کی وجہ سے خیبرپختونخوابڑی تباہی سے بچ گیا ہے۔

وکیل رہنماؤں کا کہنا تھا کہ سانحہ کوئٹہ کا غم ابھی تازہ ہی تھا کہ دہشت گردوں نے مردان میں وکلا ءکا خون بہا دیا ،یہ سلسلہ کب جا کر روکے گا۔

مردان حملے کے زخمیوں کو مردان میڈیکل کمپلیکس منتقل کردیا گیا، ریسکیو ون ون ٹو ٹو اور تمام اسپتالوٕ میں ایمرجنسی نافذ کردی گئی۔