لاہور:پاکستان عوامی تحریک کے سربراہ ڈاکٹر طاہر القادری نے حکومت کو الٹی میٹم دیا ہے کہ ان کے پنڈی پہنچے تک تمام راستے کھول دیئے جائیں ورنہ ذمہ داری حکومت پر ہو گی۔ طاہر القادری کا کہنا تھا کہ ان کے پنڈی ریلی میں شرکت کے اعلان سے حکومتی ایوان لرز گئے ہیں۔

لاہور میں اپنی رہائش گاہ سے پنڈی روانگی سے قبل میڈیا سے گفتگو کرتے ہوئے سربراہ عوامی تحریک نے الزام لگایا کہ قصاص ریلی کو روکنے کیلئے وفاق اور پنجاب حکومت غیر جمہوری طریقے استعمال کر رہی ہیں۔ اگر ان کے پنڈی پہنچنے تک راستے کلیئر نہ کئے گئے تو پھر جو کچھ ہو گا اسکی ذمہ داری نواز شریف اور شہباز شریف پر ہو گئی۔ حکومت کنٹینر ہٹا لے تو وہ ریلی کے پرامن ہونے کی ضمانت دیتے ہیں۔

سربراہ عوامی تحریک کا مزید کہنا تھا ان کے کارکنوں نے ایک ماہ تک احتجاج کیا لیکن اس دوران ایک پتہ بھی نہیں ٹوٹا۔ راولپنڈی کا جلسہ احتجاج کے پہلے مرحلے کا آخری مارچ ہے۔ وہ جلسے میں پاناما لیکس اور ملکی سالمیت پر بات کریں گے جس پر کوئی سمجھوتا نہیں ہو سکتا۔