کراچی:ملک بھر ميں آج عيد الاضحیٰ جوش و خروش سے منائی جارہی ہے مختلف شہروں میں نماز عید کے بڑے بڑے اجتماع منعقد کئے گئے، جہاں ملک میں امن وامان ، ترقی اور خوشحالی کیلئے خصوصی دعائیں مانگی گئیں ۔

اسلام آباد میں نمازعید کا سب سے بڑا اجتماع فیصل مسجد میں ہوا۔ وفاقی وزیرعبدالقادربلوچ ،سابق وزیرداخلہ رحمن ملک اوردیگراعلیٰ حکام نے فیصل مسجد میں نمازعید ادا کی، جبکہ راولپنڈی میں بھی عید کا سب سے بڑا اجتماع جامع مسجد راجہ بازارمیں ہوا۔

کراچی میں نشتر پارک، میمن مسجد اور پولو گراؤنڈ سمیت دیگر جگہوں پر عید کے بڑے اجتماعات ہوئے ، گورنر سندھ ڈاکٹر عشرت العباد اور قائم مقام صدر رضا ربانی نے پولوگراؤنڈ میں نمازعید ادا کی، اس موقع پر سیکیورٹی کے سخت انتظامات کیے گئے تھے ۔

لاہور میں وزیر اعلیٰ پنجاب شہباز شریف نے ماڈل ٹاؤن میں نماز عید ادا کی، نماز عید کے بعد ملک کی ترقی و خوشحال اور دہشتگردی کے خاتمے کیلئے دعاکی گئی۔ وزیر اعلیٰ پنجاب شہباز شریف نے اہل اسلام اور پاکستانی قوم کو عیدالاضحیٰ کی مبارکباد دی  جبکہ ملتان میں سابق وزیراعظم یوسف رضا گیلانی نے نماز عید ادا کی۔

لاڑکانہ میں گڑھی خدابخش میں نماز کا اجتماع ہوا، نماز عید میں پیپلزپارٹی کے چیئرمین بلاول بھٹوزرداری سمیت وزیراعلیٰ سندھ مراد علی شاہ،صوبائی وزیرنثارکھوڑو،سابق وزیراعلیٰ قائم علی شاہ ودیگر رہنما نے شرکت کی اپوزیشن لیڈر خورشیدشاہ نے منزل گاہ گراؤنڈ میں عید کی نماز ادا کی۔

مظفرآباد شہرمیں چون ضلع بھرمیں دو سو انیس مقامات پرعید کے اجتماعات ہوئے۔