ایم کیوایم کے رہنما ڈاکٹر عمران فاروق کے قتل کو 6برس بیت گئے،لندن پولیس اب بھی ملزمان کو کیفرکردار تک پہنچانے کےلئے پرعزم ہے۔

ڈاکٹر عمران فاروق کی چھٹی برسی پر میٹروپولیٹن پولیس نے ایک بار پھر بیان جاری کیا اور اس عزم کو دوہرایا کہ ملزمان کو کیفر کردار تک پہنچایا جائےگا۔

بیان کے مطابق ،اب تک 7ہزار 697دستاویزات کی چھان بین اور 4ہزار 565افراد سے پوچھ گچھ کی گئی جبکہ 4ہزار323اشیاء قبضے میں لی گئی ہیں۔

لندن پولیس نے قاتلوں تک رسائی کے لیے ایک بار پھر عوام سے مدد کی اپیل بھی کی ہے جبکہ قاتل تک پہنچنے والی معلومات فراہم کرنے پر20ہزار پونڈ انعام کا اعلان بھی کیا گیا۔

برطانوی پولیس نے دسمبر 2012 میں اس کیس کی تحقیق کے لیے ایم کیوایم کے قائد الطاف حسین کی رہائش گاہ پر بھی چھاپہ مارا اوران کے گھراور لندن آفس سے 5 لاکھ سے زائد برطانوی پاؤنڈز برآمد کیے۔

برطانوی پولیس کی ویب سائٹ پر جاری کی گئی تصاویر کے مطابق، 29 سالہ محسن علی فروری سے ستمبر 2010 تک برطانیہ میں مقیم رہا جبکہ 34 سالہ محمد کاشف خان ستمبر 2010 کے اوئل میں برطانیہ پہنچا تھا۔

جون 2015 میں 2 ملزمان محسن علی اور خالد شمیم کی چمن سے گرفتاری ظاہر کی گئی تھی جن سے جے آئی ٹی ٹیم نے تفتیش کی بعدمیں پاکستان نے برطانیہ کو ان ملزمان تک رسائی دی۔

باون سالہ ایم کیوایم رہنما ڈاکٹر عمران فاروق کو جمعرات 16 ستمبر2010 کو شام ساڑھے 5 بجے ایجویر گرین لائن میں اس وقت قتل کردیا گیا جب وہ اپنے گھر جارہے تھے۔

پوسٹ مارٹم رپورٹ مین ان کی موت کی وجہ سرپر لگنے والے چھوٹ اور پیٹ میں تیز دھا آلے سے لگنے والے زخموں کو قرار دیا گیا۔