کراچی: کراچی کی انسداد دہشت گردی کی عدالت نے ایم کیو ایم کے رہنما کی اشتعال انگیز تقریر کیس کی سماعت15 اکتوبر تک ملتوی کردی گئی۔

 آٹھ مقدمات میں ایم کیوایم پاکستان کے سربراہ فاروق ستار اوررہنما نسرین جلیل سمیت دیگر کے وارنٹ گرفتاری جاری کردیئے گئے، جبکہ خواجہ اظہارالحسن کی ضمانت میں توسیع کردی گئی ہے۔

انسداد دہشت گردی عدالت میں  ایم کیو ایم کے بانی  کی اشتعال انگیز تقریر کےکیس کی سماعت جج کی رخصت کے باعث15اکتوبر تک ملتوی کردی گئی۔

مقدمے میں گرفتار میئر کراچی وسیم اختر اور  قمر منصور کو جیل سے عدالت نہیں لایا گیا، جبکہ ایم کیوایم رہنما خواجہ اظہارالحسن عدالت میں پیش ہوئے،عدالت نے 8 مقدمات میں ایم کیو ایم کے سربراہ ڈاکٹر فاروق ستار، نسرین جلیل و دیگر کے ایک بار پهر وارنٹ گرفتاری جاری کردیئے۔

سماعت کے بعد غیر رسمی گفتگو میں خواجہ اظہار کا کہنا تها کہ راؤ انوار وائرلیس پر کسی کو مسلسل میری گرفتاری سے متعلق آگاہ کررہے تھے اورمجھے ٹارگٹ کلرز کا سربراہ بتا رہے تھے، وزیر اعلیٰ اور آئی جی سندھ نیک نیتی سے راؤ انوار کے خلاف کارروائی کریں تو بہتر ہے۔