کراچی: سندھ اسلبلی  کے اجلاس میں  بانی ایم کیوایم الطاف حسین کی 22اگست کی تقریر کیخلاف مذمتی قرارداد متفقہ طور پر منظور کرلی گئی ۔

مذمتی قراردادیں ایم کیو ایم،پاکستان تحریک انصاف ، مسلم لیگ نون، فنگشنل لیگ سمیت دیگر جماعتوں کی جانب سے پیش کی گئیں ۔

 ایوان نے ایم کیوایم بانی کیخلاف آرٹیکل 6 کے تحت مقدمہ درج کرنے کا مطالبہ کردیا۔

ایم کیوایم کے رہنما سید سردار احمد نے بانی ایم کیوایم کی 22 اگست کی تقریر کے خلاف مذمتی قرار داد پیش کرتے ہوئے اس کی شدید مذمت کی ۔

پیپلزپارٹی کی جانب سے  خیرالنساء مغل نے بانی ایم کیوایم کی تقریر کے خلاف مذمتی قرار داد ایوان میں پیش کی۔

تحریک انصاف کے رہنما خرم شیر زمان نے ایم کیوایم پاکستان کی قرارداد پیش کیے جانے کو سراہا اور انہیں سلام پیش کیا ۔

انہوں نے کہا کہ اب شہر میں بھتہ خوری، ٹارگٹ کلنگ اور بوری کی سیاست کا خاتمہ ہونا چاہیے انہوں نے بانی ایم کیوایم کے خلاف آرٹیکل 6 کے تحت کارروائی کرنے کا مطالبہ بھی کیا۔

بانی ایم کیوایم کیخلاف مسلم لیگ نون کی جانب سے  سورٹھ تھیبو نے ایوان میں مذمتی قرار داد  پیش کی گئی۔

اجلاس میں ایم کیو ایم سمیت دیگر دہنماؤں نے اپنے اپنے موقف بھی پیش کئے۔

ایم کیو ایم  رہنما فیصل سبزواری نے درخواست کی کہ ہمیں دیوار سے نہ لگایا جائے،مہاجر غدار نہیں اور ہم مہاجروں کے غدار نہیں۔

خواجہ اظہار الحسن نے بھی ان کا ساتھ دیتے ہوئے کہا کہ یہ وقت ہماری پارٹی کے لئے مشکل وقت ہے اس میں ہمارا ساتھ دیا جائے۔

اس پرپاکستان پیپلز پارٹی کے رہنما  نثار کھوڑو نے کہا کہ کسی ایک شخص کی بدزبانی کی سزا پوری قوم کو نہ دی جائے۔

سندھ اسمبلی کے اجلاس میں اظہار خیال کرتے ہوئے قائد حزب اختلاف خواجہ اظہار الحسن آبدیدہ ہوگئے ۔

 انہوں نے کہا ایم کیو ایم آج بھی کراچی آپریشن کی حمایت کررہی جو ہم پر گزر رہی ہے اس کا کسی کو اندازہ نہیں۔

انہوں نے کہا کہ ہمارے پاس تین آپشنز تھے، ملک سے باہر چلے جاتے، پارٹی بدل لیتے لیکن ہم نے پارٹی میں رہ کر انگاروں کے اس راستے پر چلنا گوارا کیا، ہم نے فیصلہ کیا کہ قوم کو برے وقت میں نہیں چھوڑیں گے۔

ایم کیوایم کے رہنما فیصل سبزواری نے کہا کہ اہمیں دیوار سے نہ لگایا جائے،مہاجر غدار نہیں اور ہم مہاجروں کے غدار نہیں۔

 وزیرنثارکھوڑونے کہا ایک شخص کی بدزبانی پر پوری برادری کو سزا نہ دی جائے،قائد اعظم نے پاکستان زبان کی بنیاد پرنہیں بنایا،لسانی سیاست نہیں ہونی چاہیے۔

ڈپٹی اسپیکرشہلا رضا نے کہا ہمیں ملکی مفاد کے لئے صوبوں کی سیاست سے آگے نکلنا ہوگا ۔

اجلاس سے دیگر سیاسی جماعتوں کے رہنماؤں نے بھی خطاب کیا۔