ٹیکسلا:پاکستان تحریک انصاف کے سربراہ عمران خان نے کہا ہے کہ نیب کا چیئرمین باضمیر ہوتا تو پاناما لیکس کے ایک ہفتے بعد ہی نواز شریف کو جیل میں ڈال دیتا ۔

 ٹیکسلا میں پی ٹی آئی نے جلسے کا میدان سجایا۔ جلسے سے خطاب میں عمران خان نے کہا کہ  ہمیں انصاف کے اداروں سے انصاف نہیں ملا ۔ تیس تاریخ کو رائیونڈ میں پاکستان کی تاریخ کا سب سے بڑا انسانی سمندر ہو گا ۔ روکنے کی کوشش کی تو تصادم ہو گا اور ذمہ دار حکومت ہو گی۔

عمران خان حسب معمول وزیراعظم نوازشریف پر برستے رہے اورکہا اگر وزیراعظم کرپٹ ہو تو پٹواری تک کرپٹ ہوجاتا ہے۔کپتان کا کہنا تھا کہ تیس ستمبر کو رائیونڈ میں عوام کا سمندر ہو گا۔

عمران خان نے کہا کہ گلو کہتے ہیں ٹانگیں توڑ دیں گے، لیکن یہ پولیس کے بغیر کچھ نہیں کرسکتے،دو ہزار آٹھ میں نوازشریف کو جدہ واپس بھجوایا گیا تو گلو دم دبا کر بلوں میں نہ گھس جاتے۔

عمران خان نے کشمیر میں بھارتی مظالم کی بھی مذمت کی ،انہوں نے کہا کہ کشمیری بھارتی فوج کے سامنے سیسہ پلائی ہوئی دیوار بن گئے، کشمیر میں جتنا فوج کا استعمال ہوگا،نفرتیں بڑھیں گی، پوری پاکستانی قوم فوج کے ساتھ کھڑی ہے۔