لاہور:پاکستان تحریک انصاف کے سربراہ عمران خان نے وزیراعظم نوازشریف سے مطالبہ کیا ہے کہ وہ خود کو احتساب کیلئے پیش کریں ،ورنہ محرم کے بعد وہ حکومت کو چلنے نہیں دینگےاور اگر اب اسلام آباد جائیں گے تو شہر کو مکمل طور پر بند کرینگے۔

تحریک انصاف نے رائیونڈ میں وزیراعظم نوازشریف کی مبینہ کرپشن کیخلاف عوامی طاقت کا مظاہرہ کیا انہوں نے کہا کہ وہ پاکستان کو ڈاکوؤں کے ہاتھوں تباہ ہوتے نہیں دیکھ سکتے۔

اڈا پلاٹ میں جلسے سے خطاب کرتے ہوئے عمران خان کے لہجے میں جھنجھلاہٹ، کرختگی اور تلخی نمایاں تھی،انہوں نے شریف خاندان پر کڑی تنقید کرتے ہوئے کہا کہ نوازشریف کا مسئلہ دل کا نہیں پیٹ کا ہے عوام کے اربوں روپے کھانے سے انہیں بدہضمی ہوگئی ہے۔

عمران خان نے کہا کہ اب جلسے نہیں کریں گے بلکہ اسلام آباد کو بند کردیں گے،نوازشریف محرم تک خود کو احتساب کیلیے پیش کریں ورنہ انہیں حکومت نہیں کرنے دیں گے۔

عمران خان نے کہا کہ ہماری بدقسمتی ہے کہ نوازشریف ہمارے وزیراعظم ہیں،انہوں نےاثاثے چھپائے،کرپشن،ٹیکس چوری اور منی لانڈرنگ کی،،اگر نوازشریف کو برطانیہ کا وزیراعظم بنادوتو پانچ سال میں برطانیہ کا بھی دیوالیہ نکال دیں گے۔

کپتان نے ساتھ چھوڑنے پر دیگر سیاسی جماعتوں کو بھی خوب طعنے دیے،انہوں نے کہا کہ ساتھ نہ دینے کیلیے طرح طرح کے بہانے کیے گئے اور پھر کہا جاتا ہے کہ میں اکیلا رہ گیا ہوں، کیا میں رشتہ لینے گیا تھا۔

عمران خان نے قومی اداروں کے ساتھ ساتھ میڈیا کو بھی خوب جھنجوڑا،بولے دو میڈیا چینلز پر بڑا پیسہ چلا ہوا ہے یہ چینل سمجھتے ہیں پیسہ لیکر پروپیگنڈا کرتے رہیں گے لوگوں کو پتہ ہی نہیں چلے گا۔