اسلام آباد:پیپلز پارٹی کے چیئرمین بلاول بھٹو زرداری نے کہا ہے کہ عمران خان نے غلط بات کی اور ایک دن ان کو بھی مائنس کرنے کی بات ہوگی۔

پی پی کے چیئرمین بلاول بھٹو زرداری نے جے یو آئی کے سربراہ مولانا فضل الرحمان سے ملاقات کی ۔ملاقات کے بعد میڈیا سے گفتگو میں بلاول نے عمران خان پر تنقید کی اور  فضل الرحمان کو انکل قرار دیا جبکہ وزیراعظم پر سخت تنقید کرنے سے گریز کیا۔ بلاول نے الطاف حسین کو بھی سیاسی حقیقت قرار دے دیا۔

پیپلز پارٹی کے چیئرمین بلاول بھٹو زرداری نے مولانا فضل الرحمان سے ملاقات کے بعد میڈیا سے بات چیت کی۔ جس میں ان کا کہنا تھا کہ عمران خان کے منہ سے غلط باتیں نکلیں۔

بلاول کا کہنا تھا کہ لوگوں نے میرے شہید نانا کو مائنس ون کیا،شاہنواز،مرتضی اور بے نظیرکو بھی مائنس کیا گیا،آج آصف زردارکی کی بات ہورہی ہے،ایک دن آئے گا کہ مجھے بھی مائنس کرنے کی بات ہوگی۔

پی پی چیئرمین نے مزید کہا کہ نواز شریف نے مودی کو گھر میں دعوت دے کر منفی تاثر دیا مگر ملک کے منتخب وزیراعظم کو غدار کہنے کا سوچ بھی نہیں سکتا۔

بلاول نے کہا کہ انہوں نے کبھی الطاف حسین کو غدار نہیں کہا ،الطاف حسین کل بھی ایک سیاسی حقیقت تھے اور آج بھی ہیں۔

اس موقعے پر مولانا فضل الرحمان کا کہنا تھا کہ کشمیر پر پیپلزپارٹی کا کردار قابل تحسین ہے۔اے پی سی اورپارلیمنٹ میں پیپلزپارٹی نے مثبت کردار ادا کیا۔

بلاول بھٹو کا کہنا تھا کہ پاناما ایشو جلد حل کیا جائے اور مولانا صاحب سے درخواست ہے کہ وزیراعظم کو سمجھائیں۔