لاہور:وزیر اعلیٰ پنجاب شہباز شریف سے جمعیت علماء اسلام کے سربراہ مولانا فضل الرحمن سے ملاقات کی ہے،جس میں تحریک انصاف کی جانب سے اسلام آباد بند کرنے کی کال پر تبادلہ خیال کیاگیا۔

لاہور میں وزیر اعلیٰ پنجاب شہباز شریف اور مولانافضل الرحمن کی ہونے والی ملاقات میں اس بات پر اتفاق کیا گیا کہ تحریک انصاف کی جانب سے اسلام آباد بند کرنے کا اعلان عوام کے ساتھ کھلی دشمنی ہے۔

شہباز شریف کا کہنا تھا کہ اسلام آباد بند کرنے والے تیز رفتار ترقی کا سفر روکنا چاہتے ہیں۔ منفی سیاست کے علمبردار سی پیک کو بند کروا کر کروڑوں عوام کی خوشیاں چھیننے کے در پے ہیں۔

ان کا کہنا تھا کہ شکست خوردہ عناصر کو نظر آ رہا ہے کہ ترقیاتی منصوبے مکمل ہو گئے تو انکی رہی سہی سیاست بھی ختم ہو جائے گی۔

اس موقع پر مولانا فضل الرحمن کا کہنا تھا کہ پاناما کیس عدالت میں لے جانے کا اپوزیشن کا مطالبہ تسلیم ہونے اور سماعت شروع ہونے کے بعد سڑکوں پر مظاہروں کا کوئی اخلاقی جواز نہیں،عمرا ن خان اپنی پے در پے شکست کا انتقام غریب عوام سے نہ لیں۔