اسلام آباد:پاکستان عوامی تحریک کے سربراہ طاہر القادری نے بھی دو نومبر کو اسلام آباد میں احتجاج کی دعوت قبول کرلی۔

پاکستان تحریک انصاف کے سربراہ عمران خان اور طاہر القادری کے درمیان ٹیلی فونک بات چیت ہوئی ہے، جس میں ملکی سیاسی صورتحال، دونومبر کو اسلام آباد میں احتجاج سمیت دیگر باہمی دلچسپی کے امور پر تبادلہ خیال کیا گیا اور اب عمران خان کی دعوت پر طاہرالقادری نے دھرنے میں شرکت کی دعوت قبول کرلی ہے۔

پہلے عوامی مسلم لیگ کے سربراہ شیخ رشید نے بھی پاکستان عوامی تحریک کے رہنماوں سے مرکزی سیکریٹریٹ میں ملاقات کی تھی جس میں ایک مرتبہ پھرپاکستان  عوامی تحریک کو دھرنے میں شرکت کی دعوت دی تھی۔

 اس موقعے پران کی لندن میں موجود  عوامی تحریک کے سربراہ ڈاکٹر القادری سے بھی ٹیلی فونک بات چیت کی تھی  تاہم بات چیت میں طاہر القادری نے دھرنے کے شرکاء کو سیاسی اور اخلاقی حمایت فراہم کرنے کی یقین دہانی کروائی تھی تاہم دھرنے میں باضابطہ شرکت کو انہوں نے مزید مذاکرات سے مشروط کردیا تھا۔

اب طاہر القادری نے بھی اسلام آباد میں دھرنے میں شرکت کی یقین دہانی کروادی ہے اور کہا ہے کہ خرم نواز احتجاج کا طریقہ کار طے کرینگے۔ انہوں نے عمران خان سے بھی ٹیلی فونک بات چیت کی تصدیق کی اور کہا کہ خرم نواز گنڈاپوری کو فیصلے سے آگاہ کردیا ہے۔