اسلام آباد:سپریم کورٹ نے شریف خاندان سے جائیداد اورآمدنی سے متعلق تفصیلات دستاویزی شکل میں مانگ لیں ۔

عدالت عظمیٰ میں پاناما لیکس کی سماعت ہوئی ،سماعت کے ابتداء میں وزیراعظم کے وکیل سلمان بٹ نے حسن ، حسین اور مریم نوازکے جوابات جمع کروائے ،جس میں کہاگیا کہ نوازشریف کا کوئی بچہ عوامی عہدہ نہیں رکھتا ۔

 جسٹس شیخ عظمت سعید نے استفسارکیا کہ وزیراعظم نے گوشواروں میں اپنے بچوں کو کفالت میں ظاہرکیا ہے۔

 سلمان بٹ کا کہنا تھا کہ گوشواروں میں ایسی کوئی بات نہیں ۔ اس پرعدالت کا کہنا تھا کہ آپ کی بات سے ذیادہ دستاویزات کواہمیت دیں گے ۔

جسٹس اعجازالحسن نے مریم نواز کے ٹیکس سے متعلق استفسارکیا جس پروکیل نے بتایا کہ مریم نواز نے 2009میں ٹیکس دینا شروع کیا مریم نوازکسی جائیداد کی مالک نہیں صرف 2کمپنیوں نیلسن اورنیسکول کی ٹرسٹی ہیں اور ان جائیدادوں سے کوئی فائدہ بھی نہیں لیتیں ۔مریم نوازنے خود پرلگائے گئے الزمات مسترد کیا ۔

 سلمان بٹ نے بتایا کہ حسن نواز16سال سے بیرون ملک قانون کے مطابق کاروبار کر رہے ہیں ،2006 سے پہلے آف شورکمپنیاں شریف خاندان کی ملکیت نہیں تھیں ۔

جسٹس شیخ عظمت سعید کا کہنا تھا کہ لگتا ہے آپ عدالت سے کچھ چھپا رہے ہیں ۔ جسٹس آصف سعید کھوسہ کا کہنا تھا کہ عدالت کلین چٹ بھی دے سکتی ہے اورفیصلہ مخالف بھی آسکتا ہے لیکن پہلے دستاویزات جمع کرانا ہوں گی ۔

عدالت نے دستاویزات جمع کرنے کیلئے 15 نومبرتک کی مہلت دیتے ہوئے سماعت ملتوی کردی ۔

 عدالت نے تنبیہ کی کہ دستاویزات جمع نہ کروانے کا مطلب یہی لیا جائے گا کہ کچھ چھپایا جا رہا ہے ۔  بادی النظرمیں جائیداد اورآمدنی میں تعلق نظرآرہا ہے۔

http://www.dailymotion.com/video/x510o1x