بنی گالہ :چئیرمین تحریک انصاف عمران خان کا کہنا ہے کہ وزیراعظم نے  دو ہفتوں کی مہلت مانگ کرثابت کردیا کہ وہ خود کواحتساب کے لئے پیش نہیں کرنا چاہتے۔ حکومت کی  جانب سے تاخیری حربے استعمال کیے جارہے ہیں ۔

بنی گالہ میں میڈیا سے گفتگوکرتے ہوئے عمران خان کا کہنا تھا کہ جمہوریت میں وزیراعظم جوابدہ ہوتا ہے ۔ نوازشریف  کے وکیل نے مزید دو ہفتوں کی مہلت مانگ کرثابت کردیا کہ نواز شریف پاناما لیکس کے معاملے پراحتساب  کیلئے تیارنہیں ہیں۔

عمران خان کا کہنا تھا کہ کیس زیادہ لمبا نہیں چلے گا۔  فیصلہ دو سماعتوں میں بھی ہوسکتا ہے،سپریم کورٹ نے یہ بھی کہا ہے کہ اگر چار سوالوں کے جوابات دے دیئے جائیں تو شاید کمیشن کی ضرورت ہی نہ پڑے۔

پی ٹی آئی چیف نے مزید کہا کہ حکومت کیس میں مزید لوگ شامل کر کے تاخیری حربے استعمال کرنا چاہتی ہے ۔ میں نے جو فلیٹ  انیس سو تراسی میں لیا تھا اس کو کبھی نہیں چھپایا، میں ہر فورم پر احتساب کے لئے تیار ہوں۔

عمران خان نے کہا کہ شریف خاندان والے کہتے ہیں کہ دوہزارپانچ سے پہلے مے فئیرکی جائیداد ان کی ملکیت نہیں تھی جبکہ میں نے نوے کی دہائی میں مے فیئراپارٹمنٹ کے سامنے احتجاج کیا تھا ۔

چیئرمین تحریک انصاف نے مزید کہا کہ نیب مغل اعظم کے خلاف کارروائی کرنا ہی نہیں چاہتی تھی۔

]]> Pakistan https://www.aaj.tv/news/68765 Mon, 07 Nov 2016 15:27:41 +0500 none@none.com (ھمیر رانا)