چیئرمین تحریک انصاف عمران خان کہتےہیں کہ نون لیگ اور درباریوں کا مؤقف سے پھر جانا حواس باختگی کی علامت ہے۔

چیئرمین تحریک انصاف عمران خان کی زیر صدارت بنی گالہ میں ہونے والے اجلاس میں  وزیراعظم کے بچوں کی آف شورکمپنیوں پرحکومتی موقف کی تبدیلی پرغورکیا گیا۔

عمران خان کا کہنا تھا کہ وزیر اعظم کےحواریوں کے پاس لوٹ مار کے دفاع میں مزید کہنے کیلئے کچھ نہیں،وزیراعظم اور ان کے خاندان کے پاس مناسب جواب ہوتا تو عدالت میں پہنچتے ہی سب سوالوں کے جواب دے دیتے۔

نون لیگ میڈیا میں جو بات کہتی ہے عدالت میں اس کے ذکر تک سے ڈرتی ہے،پاناما لیکس کی طرح نیوز گیٹ پر بھی مٹی پاؤ مہم نہیں چلنے دیں گے۔

اجلاس میں مقبوضہ کشمیر میں بھارتی جبر اور جنگ بندی لکیر پر بھارتی توپخانے کی شرانگیزیوں اورحریت رہنماؤں کی دوبارہ گرفتاری کی مذمت کی گئی۔