کراچی:پیپلزپارٹی نے ایم کیو ایم پاکستان کو سندھ حکومت میں شامل کرنے کی تیاری کرلی ہے، وزیراعلیٰ سندھ اعلیٰ قیادت سےمشاورت کیلئے دبئی پہنچ گئے۔

سندھ میں نئی سیاسی صف بندی کی تیاری ہو رہی ہے ،ایم کیو ایم کے سابق صدر پرویز مشرف سے رابطے تو نتیجہ خیز نہ ہو سکے،تاہم اب پیپلز پارٹی اور ایم کیو ایم کے درمیان رابطے شروع ہوگئے ہیں۔

خبریں ہیں کہ پیپلزپارٹی ایک بار پھر ایم کیو ایم پاکستان کو سندھ حکومت شامل کرنا چاہتی ہے،ابتدائی رابطوں کے بعد پیپلزپارٹی کی اعلیٰ قیادت نے وزیراعلیٰ مراد علی شاہ کو دبئی بلالیا ہے۔

وزیراعلیٰ سندھ 4ماہ کے دوران ساتویں دبئی یاترا کے دوران 6 نئے معاونین خصوصی کے ناموں کی منظوری بھی پارٹی کی اعلیٰ قیادت سے حاصل کریں گے۔

ترجمان وزیر اعلیٰ  سندھ کا کہنا ہے کہ مراد علی شاہ سندھ حکومت کی 100دن کی کارکردگی رپورٹ بھی شریک چیئرمین آصف زرداری کو پیش کریں  گے،وہ پارٹی کی اعلیٰ قیادت کو صوبے میں امن وامان کی صورتحال سے آگاہی کریں گے اس کے علاوہ صوبے میں جاری ترقیاتی منصوبوں کے بارے میں بھی بتائیں گے۔