خیرپور ٹامیوالی:خیرپورٹامیوالی میں پاکستان کی بری اورفضائی افواج کی جانب سے رعدالبرق مشقیں کی گئیں ،وزیراعظم نوازشریف اورآرمی چیف جنرل راحیل شریف نے مشقوں کا معائنہ کیا۔۔

اس حوالے سے منعقدہ تقریب میں چیئرمین جوائنٹ چیفس آف اسٹاف، تینوں مسلح افواج کے سربراہان، وزیردفاع خواجہ آصف، وزیرخزانہ اسحاق ڈار، اسپیکرقومی اسمبلی ایازصادق بھی شریک تھے۔

اس موقع پر پاک فضائیہ کے طیاروں سے اہداف کو نشانہ بنانے کا مظاہرہ کیا گیا۔ ایف 16طیارے نے کامیابی سے اپنے ٹارگٹ کونشانہ بنایا۔

جے ایف تھنڈرطیاروں کی آوازوں سے بھی فضا گونج اٹھی، جنہوں نے لاجواب کرتب دکھا کرحاضرین کے دل جیت لئے۔

کوبراگن شپ ہیلی کاپٹرزاور زیڈٹین ہیلی کاپٹرز نے بھی اپنی بہترین صلاحیتوں کا مظاہرہ کیا۔الخالد ٹینک سے فرضی دشمن کے اہداف کو نشانہ بنانے کا بھی شاندار مظاہرہ کیا گیا۔

کورکمانڈرملتان لیفٹیننٹ جنرل اشفاق ندیم نے مشقوں میں استعمال ہونے والے ہتھیاروں پربریفنگ دی۔

 انہوں نے کہا کہ مشقیں پاکستانی افواج کی بہترین صلاحیتوں کی مثال ہیں۔مشقوں کے مشاہدے کیلئے  مختلف ممالک کے سفیر، مندوبین اور سعودی مسلح افواج کے ڈپٹی چیف آف اسٹاف بھی تقریب میں موجود تھے۔