راولپنڈی :سپہ سالار عہدہ سے چند دن بعد سبکدوش ہونے والے جنرل راحیل شریف کا تین سالہ دور ، انسداد دہشت گردی ، داخلی اور خارجی محاذوں کے حوالے سے ہنگامہ خیز رہا ، انہوں نے سول ملٹری قیادت کے تعلقات میں بھی کئی اتار چڑھاؤ نمٹے.

تابناک فوجی پس منظر والے جنرل راحیل شریف کودوہزار تیرہ ء میں نئی حکومت سنبھالنے والے وزیراعظم نوازشریف نے  انتیس نومبر کو آرمی چیف بنایا ، نئی سویلین حکومت اور نیا فوجی حمکران ، فوری چیلنج  درپیش شدت پسندوں سے نمٹنے کا تھا۔

 اتمام حجت کیلئے طالبان سے ناکام امن مذاکرات کے بعد سپہ سالار کا پہلا بڑا چیلنج  تھا دہشت گردی کا خاتمہ ،لہذا آپریشن ضرب عضب بھرپور فوجی طاقت سے شروع کیا۔کچھ ہی عرصہ بعد عمران خان اور طاہرالقادری کے اسلام آباد دھرنے میں فوجی کو سیاست میں ملوث کیا گیا تو جنرل راحیل نے کمال فراست سے کردار ادا کیا۔

آرمی پبلک سکول پشاور کا سانحہ ہوا تو فوجی سپہ سالار نے سویلین سیاسی قیادت کو ون پیج پر لیا،نیشنل ایکشن پلان بنا۔

سول اور فوجی قیادت کی ایپکس کمیٹیوں نے عسکریت پسندی چن چن کر ختم کرائی، بڑھتی داعش روکنے کیلئے خفیہ آپریشنز، کراچی امن کیلئے نتیجہ خیز کارروائی، سب واضح پیشرفت ہوئی، جنرل راحیل نے خارجی محاذ پر افغانستان سے مفاہمت کی حوصلہ مند کوشش ، غیرروایتی طور پر روس جیسے ممالک سے دفاعی روابط کا فروغ، پاک چین اقتصادی راہداری کا ہموار آغاز کرایا۔

سعودی عرب کی قیادت میں مسلم فورس کی تشکیل، بھارت سے غیرنرم دوٹوک پالیسی، جنرل راحیل کی حوصلہ مندی کا ثبوت رہے، جنرل راحیل نے اپنے آخری ہفتوں میں اسلام آباد لاک ڈاؤن کی وہ کال بھی دیکھی جب مبینہ سکیورٹی لیکس خبر کے تناظر میں سول ملٹری تعلقات پر دوبارہ سوالات اٹھائے جارہے تھے ۔