خیبر پختونخوا:خیبر پختونخوا، گلگت بلتستان اور آزاد کشمیر کے مختلف شہروں میں بارش اور پہاڑی علاقوں میں برفباری سے موسم مزید سرد ہوگیا، محکمہ موسمیات کے مطابق آئندہ چوبیس گھنٹوں کے دوران بارش اور برفباری کا امکان ہے۔

گلگت، اسکردو،غذر، استوراورچترال سمیت مختلف شہروں میں رم جھم اور برفباری جاری ہے،بعض علاقوں میں برفباری سے رابطہ سڑکیں بھی بند ہیں، پہاڑ بھی سفید چادر اوڑھے قدرت کے حسن پر نازاں ہیں۔

غذر میں کئی علاقوں میں برفباری سے رابطہ سڑکیں بند ہوگئیں جس کے باعث ٹریفک کی آمد و رفت معطل ہوکر رہ گئی،شدید سردی میں لکڑی اور گیس کی عدم فراہمی نے عوام کی مشکلات میں اضافہ کردیا ہے۔

خیبر پختونخوا کے بیشتر اضلاع میں گزشتہ رات سے وقفے وقفے سے بارشوں کا سلسلہ جاری ہے،محکمہ موسمیات کے مطابق بارش کا سلسلہ آئندہ بارہ گھنٹے تک جاری رہے گا۔