اشک آباد: ترکمانستان کےدارالحکومت اشک آباد میں وزیراعظم نوازشریف نے میڈیا سےگفتگو کرتے ہوئے کہا ہے کہ  پیپلزپارٹی 90کی دہائی کی سیاست کررہی ہے۔

وزیراعظم نے میثاق جمہوریت کی قلعی بھی کھول دی  اورکہا کہ میثاق جمہوریت صحیح طرح نہیں چل سکی،پیپلزپارٹی تو نوے کی دہائی کی طرف لوٹ رہی ہے۔

انہوں نے کہا کہ 70سال سے جس طرح ملک چلایا اب ملک کواس طرح چلانے کے متحمل نہیں ہوسکتے۔

وزیراعظم نے  افسوس  کا اظہار کرتے ہوئے کہا کہ کچھ جماعتوں نے مجھ سے کئی بار استعفیٰ دینے کیلئے کہا لیکن سب سن لیں کہ ہم انتخاب لڑکر مستعفی ہونے کیلئے نہیں آئے۔

انہوں نے کہا کہ  کیا ہم نے ماضی کی حکومت سے استعفیٰ کی بات کی،کبھی دھاندلی کا رونا نہیں رویا، کوئی ایسا کام نہیں کیا جس سے جمہوریت کو خطرہ ہو،خیبرپختونخوا میں پی ٹی آئی کی راہ میں روڑے نہیں اٹکائےنیشنل پارٹی کو بلوچستان میں حکومت بنانے کا موقع دیا۔

عدلیہ کی بحالی کیلیے صرف لانگ مارچ کیااور ایسا کوئی کام نہیں کیا کہ جمہوریت پٹری سے اترے اور حکومت کو نقصان پہنچا۔