اسلام آباد:قومی اسمبلی نے قانونی اصلاحات ترمیمی بل دوہزارپندرہ مسترد کردیا ۔

قومی اسمبلی کا اجلاس ڈپٹی سپیکرمرتضی جاویدعباسی کی صدارت میں جاری  ہے ، پیپلز پارٹی کے رکن ایاز سومرو نے قانونی اصلاحات ترمیمی بل 2015 قومی اسمبلی میں پیش کیا ،  حکومت کی جانب سے بل کی مخالفت کی گئی۔

وزیرقانون زاہد حامد نے کہاکہ اعلی عدلیہ کے سوموٹواختیارکے معاملے پرآئین میں ترمیم کرنے کی ضرورت ہے۔ سوموٹونوٹس کے خلاف اپیل کے حق کا میں بھی حامی ہوں ۔ اس معاملے پرقانون میں ترمیم کی بجائے آئین میں ترمیم ضروری ہے۔

ن لیگ کے رکن میجر ریٹائرڈ طاہر اقبال نے قرآن پاک کی اشاعت ترمیمی بل 2015 پیش کیا۔

 وزیر مملکت مذہبی امورپیرامین الحسنات نے کہا کہ حکومت اس معاملے پرخود ایک بل تیارکررہی ہے ،قرآن پاک کی اشاعت ترمیمی بل 2015 مؤخرکردیا گیا ۔

 جے یو آئی ف کی جانب سے نجی ٹی وی چینل کے اینکرکی جانب سے مولانا فضل الرحمان اوردیگرارکان پارلیمنٹ کی کردارکشی کے حوالے سے توجہ دلاو نوٹس پرارکان نے کہاکہ نجی ٹی وی چینلزکی جانب سے سیاستدانوں کی کردارکشی کا سلسلہ روکا جائے،پیمرا نے بھی اس حوالے سے مکمل خاموشی اختیارکررکھی ہے۔

 ارکان جے یو آئی ف نے مطالبہ کیا کہ ایسے اینکرزپرمکمل پابندی عائد کی جائے۔

 وزیر مملکت طارق فضل چوہدری نے یقین دہانی کرائی کہ  اس معاملے پر پیمرا سے رجوع کریں گے، قائمہ کمیٹی استحقاق میں بھی اس ایشو اٹھائیں گے،  الزامات جھوٹے ثابت ہوئےتومتعلقہ اینکرکےخلاف کارروائی ہوگی۔