اسلام آباد:سپریم کورٹ میں پاناما پیپرز کی سماعت کے دوران جسٹس عظمت سعید نے ریمارکس دیتے ہوئے کہا کہ مریم نواز کی زیرکفالت ہونے کا معاملہ ابھی تک حل نہیں ہوا۔

سپریم کورٹ میں پاناما کیس کی سماعت چیف جسٹس انورظہیر جمالی کی سربراہی میں 5رکنی لارجر بینچ کررہا ہے۔

کیس کی ابتدا میں مریم نوازکی کفالت کا معاملہ زیربحث رہا۔

جسٹس عظمت سعید نے کہاکہ وزیراعظم نے مریم نوازکیلئے زمین کب خریدی ، رقم کب ادا کی ، رقم والد نے بیٹی کوتحفے میں دی اوراس رقم سے بیٹی نے والد کیلئے زمین خرید کرواپس کردی۔

جس کے جواب میں وزیر اعظم کے وکیل سلمان بٹ نے دلائل پیش کرتے ہوئے  کہا کہ بیٹیوں کوسب تحائف دیتے ہیں تحفہ دینے سے مریم نواززیرکفالت نہیں ہوجاتی ۔

جسٹس اعجازالاحسن نے کہاکہ دلائل اب تک مریم نوازکے زیرکفالت ہونے کے معاملے حل نہیں کرپائے ۔

 سلمان بٹ نے کہاکہ مریم نوازوالد کے زیرکفالت نہیں اوروزیراعظم  مریم نوازکے گوشوارے ظاہرکرنے کے پابند نہیں ۔

آصف کھوسہ نے استفسارکیا کہ دستاویزات کے مطابق، مریم کچھ کمپنیوں کی بینیفشری ہیں ،اگرزبانی ڈیڈ دستاویزات کے برعکس ہوتواس کی کیاحیثیت ہوگی ، کوومبرکمپنی سمیت دیگرپاناما کمپنوں سے متعلق استفسارپرسلمان بٹ نے بعد دلائل دینے کا کہا ۔

جس پرجسٹس عظمت نے کہا کہ اس بات پرکیوں نہیں آرہے یہ ہم جانتے ہیں۔

 جسٹس عظمت نے دبئی مل سے متعلق استفسارکیا تو سلمان بٹ بولے 40سالہ پرانا ریکارڈ کہاں سے لائیں ،دبئی کے بینک 5 سال سے زیادہ کا ریکارڈ نہیں رکھتے ، ہمیں کیا پتہ کی 4سال پہلے اسکول کی کتنی فیس جمع کرائی ۔

جس پر جسٹس آصف کھوسہ نے کہا کہ سلمان بٹ اپنے موکل وزیراعظم کے دفاع کیلئے بہت خطرناک دلائل دے رہے ہیں ۔

جسٹس اعجازالاحسن نے کہاکہ وزیراعظم نےتقریرمیں قطرکا زکرنہیں کیا قطرمیں سرمایہ کاری اوررقم منتقلی کا کوئی ریکارڈ نہیں۔

سلمان بٹ نے کہاکہ وزیراعظم کی تقریرعدالتی بیان نہیں بلکہ سیاسی تقریرتھی ،شریف فیملی کے ہرکام کی ذمہ داری نوازشریف پرنہیں آتی۔

 جس پر جسٹس اعجازنے استفسارکیا کہ دادا اورپوتے کے درمیان ہونے والی باتوں کا والد کوعلم نہیں ، الثانی خاندان سے معاملات کے دستاویزات کے استفسارپر سلمان بٹ نے کہاکہ اس کا جواب حسین نوازکے وکیل دیں گے، قطری خاندان کے ساتھ معاملات کا علم نہیں ۔

جس پر بنچ نے کہاکہ عوام کے سامنے کیوں کہا تمام ریکارڈ موجود ہے سامنے لائیں گے ؟ جو بات عدالت میں کہہ رہے ہیں بہترہوتا عوام کے سامنے کہتے اب وزیراعظم کی تقاریرکوسیاسی قرار دے رہے ہیں جس پرسلمان بٹ نے کہاکہ ریکارڈ پیش کرچکے ہیں وزیراعظم نے جوکہا سچ کہا۔

سپریم کورٹ نے کمیشن کی تشکیل پرمشاورت کے لیے سماعت میں وقفہ کیا۔ تاہم فریقین نے مشاورت کے لیے مزید مہلت کا مطالبہ کردیا۔ جس پر عدالت نے سماعت نو دسمبرتک ملتوی کردی۔