اسلام آباد:وزیراعظم نوازشریف نے کہا ہے کہ 'اگر ہم گھبرا گئے تو ملک اور قوم کدھر جائے گی'۔

جمعرات کواسلام آباد میں وزیراعظم نوازشریف نے ایف پی سی سی آئی کی تقریب میں خطاب کے دوران چیلنجزکا ذکرکرتے ہوئے کہاکہ ماضی کی غلط پالیسیوں کی وجہ سے ملکی حالات ٹھیک کرنے کیلئے وقت درکارتھا آج تک برے حالات کوٹھیک کرنے میں لگے ہوئے ہیں ۔

وزیراعظم نواز شریف نے ایک بارپھر2018میں لوڈ شیڈنگ کے خاتمے کا اعلان کیا۔

انہوں نے کہاکہ 2008میں حکومت سنبھالنے والوں نے کام کیوں نہیں کیا اسی لئے عوام آج انہیں ووٹ دینے کو تیار نہیں ۔

دہشت گردی کے حوالے سے بات کرتے ہوئے وزیراعظم کا کہنا تھاکہ دہشت گردی کیخلاف کارروائی ثواب کا کام ہے فتنے کوکچلنا ہمارا ایمان ہے۔

'پاکستان میں دہشت گردی کی کمر ٹوٹ چکی ہے کراچی میں امن بحال ہوا ، آنے والا وقت پاکستان کیلئے بہت بہترہوگا '۔

نواز شریف نے سی پیک سمیت دیگر منصوبوں کا ذکر کرتے ہوئے کہاکہ توانائی کے منصوبوں پرکام ہورہا ہے ،ایل این جی منصوبہ نجی سیکٹر سے بھی سستالگایا ،ان منصوبوں میں کوئی کک بیک نہیں ۔

'تھرسے مستقبل کی بڑی امید وابستہ ہے جہاں کارخانے لگانے کا کام شروع ہوچکا ہے ،بھاشا ڈیم پربھی اپنے وسائل سے تعمیر کا فیصلہ کیا جو تربیلا اور منگلا سے بھی بڑا ڈیم ہوگا ،پہلی بار گوادر سے کوئٹہ تک سڑک مکمل ہوچکی ہے'۔

وزیراعظم نے تحریک انصاف کو بھی تنقید کا نشانہ بنایا اور'قوم کا وقت ضائع کرنے والوں' سے سوالات پوچھے کہ کسے نیا پاکستان نظرآرہا ہے ہزارہ موٹر وے اوردہشت گردی کا قلع قمع مسلم لیگ ن کی حکومت نے کیا ۔

وزیراعظم نے کہاکہ آزاد کشمیرمیں بھی مثالی ترقی کا دورشروع ہونے والا ہے ان کی نظریں ہر جانب ہیں،گزشتہ حکومتوں کی تمام کمی پوری کی جائے گی۔